CLA, SIMPEL, HONESTO Y EFECTIVO

Pa: Armand Hessels

Esaki tabata titulo di e revista briyante di propaganda ‘Aruba Dushi Tera’ di Gobierno di AVP na juni 2015. Segun e ex-Secretario di Finansa, prof. dr. Willem Vermeend, esakinan t’e caracteristicanan di e sistema di impuesto nobo cu Aruba lo introduci dentro di dos aña: “Lo remplasa e actual sistema anticua pa un sistema comprendible y eficiente na unda e enfoke ta bin riba impuesto indirecto, mientras lo digitalisa e ehecucion mas cu ta posibel”.

META

Segun e articulo e proposito tabata “pa diseña un sistema cu ta enfoca na cobra mas liher y mas efectivo (‘compliance’) y cu lo yuda stimula economia dor di haci Aruba mas atractivo pa inversion (tambe for di exterior) den actividad duradero”.

Den esey ‘omzetbelasting’, BBO y impuesto di importacion lo desparce, mescos cu impuesto di number di auto y e sistema complica di contribucion di dunador di trabou y empleado, dispensacion y restitucion. Aunke no a establece tarifa ainda p’e sistema nobo di impuesto, no lo aumenta e peso total p’e pagadornan di impuesto.

BARI FOR DI MESA

A pesar di e tantisimo bentahanan cu a menciona y e propaganda cu a hiba, e Ministro-Presidente di AVP di e tempo ey a bari e producto final, na cual su ‘zakenminister’ di finansa tambe a aporta intensivamente, sin mas for di mesa. Esey tabata hopi straño: Ya caba for di principio di añanan ’90 di siglo pasa, instancia di Aruba y internacional a adverti Gobierno consecutivo di e desbentahanan di e sistema di impuesto anticua y complica.

Pa motivo di e cantidad di ‘loopholes’ (buraco), e posibilidad pa evadi impuesto tabata relativamente simpel. Consecuentemente Aruba tabata perde hopi entrada di impuesto. Pesey Aruba lo ricibi mas entrada cu e sistema nobo, tambe pasobra turista y ilegal lo aporta mihor. Pues, pa hopi hende tabata un misterio pakico e Prome Ministro a scoge na ultimo momento pa sigui cu e sistema di impuesto anticua, cu pa mayoria parti y den varios aspecto tabata perhudicial pa Aruba.

AHAA!

Comunidad di Aruba NUNCA a ricibi un splicacion cla di parti di Gobierno p’e cambio inespera aki. Segun un ex-funcionario di impuesto mester busca motibo di esaki den e presion fuerte di financiador di campaña pa no efectua e reforma di impuesto. Pasobra e posibilidad pa evadi impuesto lo bira hopi mas dificil.

Si lo reforma tòg, esey lo por a trece cu n’e cu nan lo reduci nan aporte n’e caha di campaña drasticamente of hasta par’e. Esey lo ta un sacrificio mucho grandi p’e partido. Pa pais Aruba esey a nifica cu e por a yama ayoo n’e miyones di florin na entrada extra di impuesto.

TRIKI DI DESAPARICION

Si esaki di berdad t’e motibo, e no tabata e unico manera cu partido na poder a kita placa for di comunidad di Aruba. Den un combersacion anterior, hopi aña prome, mi a comenta di ta contento cu e Gobierno nobo a cumpra computer y programa nobo pa oficina di impuesto. Segun otro funcionario esey tambe tabatin un motibo simpel: ora di transferi e datonan di e sistema bieu pa esun nobo, facilmente por a laga somenta e cobransanan di impuesto di financiador y miembro importante di partido. Den esey tambe por a trata di suma substancial.

INVESTIGACION

P’e motibonan aki y hopi otro mas a bira mas cu tempo pa hiba un investigacion profundo n’e berdad di esaki. Pasobra esaki lo por nifica cu corupcion politico den nos pais lo ta hopi sistematico y lo tuma lugar di varios manera. E pregunta ta si investigacion y mehoracion di esaki lo por tuma lugar cu e mesun partido(nan) ‘interesa’ na poder. Den e contexto aki e pregunta tambe ta kico ta preveni e Gobierno di coalishon actual pa concretisa e recomendacion cu tanto IMF y Hulanda ta ripiti durante hopi aña caba pa introduci BTW (VAT) lo mas pronto posibel (1 di januari 2021). Pasobra e ‘propio’ adaptacionnan cu a tuma lugar te cu awor no a hiba na aumento significativo di e confiansa…