Crisis Bank ta bati alarma i sklama na Gobiernu pa yudansa

WILLEMSTAD – Crisis Bank, e proyekto di prevenshon di hamber i pobresa di Stichting Tegen Kindermishandeling ta bati alarma i ta sklama na Gobièrnu i na komunidat pa yudansa.

For di momentu ku e krisis kousá pa Covid-19 a kuminsá, Crisis Bank a start ku yudansa inmediato di proveshon di kuminda na famianan i personanan ku a kai den pobresa i ku a pèrdè trabou pa motibu di e krisis.

Te na e momentunan aki un kantidat di más ku 17.000 pakete di kuminda ta loke Crisis Bank a distribuí riba su propio forsa.

Aparte di kuminda ku ta e nesesidat básiko prinsipal di e ser humano, Crisis Bank a bin ta yuda den otro forma tambe manera  koriente ku awa, kompra di remedi pa esnan di ménos rekurso i drechamentu di kas pa yuda na e self esteem di spesialmente muchanan.

Den e vakansi grandi di aña pasá Crisis Bank a perkurá pa no menos ku 1000 mucha di tur edat risibí unifòrm, tas i artikulo di skol pa aliviá e doló bou di e famianan.

Tur esaki Crisis Bank a logra dor di sostén di komunidat, entre otro atraves di donashon di kuminda den Goisco, donashonnan finansiero i di material i akshonnan di donashon. Crisis Bank no ta risibí sèn di Hulanda manera ta e kaso ku otro organisashonnan i tur yudansa a bira posibel danki na donashonnan chikí risibí.

Sinembargo despues di un aña di krisis e situashon no a mehorá pa hopi famia i e kantidat di personanan ku ta bati na porta pa yudansa serka Crisis Bank tambe ta sigui oumentá.

E oumento di ultimo simannan tin di aber ku e echo ku hopi famia no ta hañando sèn más riba nan karchi di SOAW i alabes debí na e anunsio di Rode Kruis resién ku lo bai wanta ku entrega di kuminda.

E desaroyo aki ta devastadó pa miles di famia ku ta pasando momentunan hopi difisil. Konsekuensha di tur esaki ta ku un fluho grandi di petishonnan pa kuminda na Crisis Bank ta sigui drenta.

Crisis Bank ta sumamente preokupá pa e situashon di pobresa ku debí na e krisis hopi famia ta pasando aden i ku ta e motibu pa hopi problema sikológiko, problema di violensia relashonal i di kriminalidat.

Crisis Bank konsiderando e situashon aktual komo unu alarmante i peligroso pa bienestar general ta hasi un yamada públiko urgente na Gobièrnu pa yudansa finansiero di tal forma ku Crisis Bank por sigui yuda e famianan i mantené e situashon den balanse.

Crisis Bank ta hasi un apelashon na sektor komersial tambe pa duna di nan parti p’asina e organisashon por sigui yuda famianan den nesesidat. Más informashon: Stichting Tegen Kindermishandeling telefòn 5221235. E-mail: kindermishandeling@gmail.com / MCB bank 330-000-000.