Den un razzia Project Team Drugspanden a detene un persona y a confisca basta droga, placa, autonan y bromer

Project Team Drugspanden ta un team cu a wordo lanta pa entre otro investiga bendemento di droga for di un percela.

Enconexion cu un investigacion  andando Project Team Drugspanden a bay na un cas na Bushiri y a detene e homber di inisialnan Y.Y.T. naci na Aruba di 40 aña.

Durante e entrada hudicial a confisca un cantidad basta grandi di diferente tipo di droga entre otro cocaina y tambe marihuana. Tambe a confisca un suma considerabel di placa.

Mirando e suma di placa confisca a dicidi di pasa e parti aki over na Afpakteam cu na nan turno tambe a confisca diferente auto y bromer. Tambe a confisca dos pistool n’e cas na Bushiri.

Diferente team special manera: K9-unit, Departamento Tecnico di Cuerpo Policial y otro teamnan tambe a participa n’e entrada hudicial aki.

Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nos tiplijn: 11141. Nos ta garantisa cu bo ta keda anonimo.