Prome Minister a firma pa ehecuta reduccion gasto den cuido medico, pero no ta cumpli

Tur cos ta mustra cu na final di dia, t’e mesun pueblo cu Prome Minister demisionario ta hunga rol di yuda dor di cambia decision pa remedinan cu a wordo elimina di lista, ta mesun pueblo perhudica pa Gobierno di Evelyn Wever Croes, lo wordo castiga dor di Hulanda den proximo dianan.

Den un carta cu a drenta for di dia prome di maart 2021 na Prome Minister demisionario di Aruba, Secretario di Estado Raymond Knops ta mustra cu apesar cu Evelyn a firma y a bay di acuerdo pa reduccion di gasto den cuido medico cu 5 miyon pa luna y 60 miyon pa aña, “tog” e lider di MEP ta bira haci net lo contrario.

Knops ta mustra cu den un reunion cu a tuma lugar dia prome di februari 2021, ya caba e lider di MEP a trata pa vries e medidanan aki, pa laga un comision studia kico por wordo haci y presenta un plan caminda lo mira con lo corta den gasto medico.

Den mesun carta aki Minister Knops ta mustra cu “desalnietemin” Premier demisionario Evelyn a dicidi cu lo suspende e lista di remedi cu ciudadanonan lo no wordo subsidia mas,  cu ta pone cu lo no logra e meta proponi den e acuerdo riba e Landenpakket, pero cu e acuerdo cu mester reduci gasto medico cu 5 miyon pa luna, tin cu wordo logra.

Esaki tin cu wordo interpreta cu mientras cu e decision politico di e lider di MEP como Prome Minister demisionario, lo tin cu bay reduci gasto medico den un of otro sector loke ta nifica cu apesar di e cambio haci den su medidanan, e lo bay perhudica e mesun ciudadanonan aki riba otro aspectonan di loke ta nan cuido medico.

Contenido di e carta di e mandatario Hulandes, ta confirma c’un biaha mas Evelyn Wever Croes no ta cumpli cu loke su persona mes a palabra cu Hulanda, caminda ya caba Knops a mustra algun luna atras, cu e reduccion den cuido medico, ta un proposicion cu a sali for di e propio Gobierno di Evelyn.

E carta aki ta bolbe confirma e hecho cu Aruba tin un Minister Presidente cu nunca tabata sincero cu su propio pueblo, caminda e no a cumpli cu loke el a priminti pueblo na 2017 cu e lo haci y awor ta hincando henter pueblo den bariga di Hulanda cu e decisionnan politico aki.

Su decision di elimina e medida caminda pueblo mes mester paga pa algun medicamente esencial cu nan tin mester, a wordo tuma ora cu den campaña pa eleccion tanto su persona como otro miembronan di su partido, a realisa e disgusto grandi cu tin den pueblo p’e medida aki.

Awor pa trata di salba algo di e medida sin piedad aki tuma contra pueblo un biaha mas, e lider di MEP kier pasa pa salvado di pueblo, mientras cu e medida aki ya el a firma y a bay di acuerdo cu esaki den e Landenpakket cu el a acepta for di aña pasa caba.

E carta di Raymond Knops ta papia palabra cla, caminda e ta confirma cu Aruba tin un Gobierno cu no sa kico e tin cu haci, cu no sa kico e ta haci y no por atende y defende interes di su pueblo y solamente kier hunga politica barata net den tempo di campaña.

For di unda lider di MEP lo bay corta den gasto medico awor no ta conoci, pero Knops a mustra bon cla cu Aruba tin cu cumpli cu reduccion di 5 miyon pa luna cual tin cu acumula na un reduccion di 60 miyon pa aña.

Sin duda Evelyn Wever Croes ta bin na altura cu kisas net despues di eleccion, e medida aki tin cu bolbe wordo implementa manera cu su Gobierno a sugeri na Hulanda di lo haci, pero e ora ya eleccion a pasa caba y e proximo Gobierno lo tin cu atende cu e tipo di mentiranan aki di e lider di MEP.