Fin di juni trahadornan publico lo cobra solamente mita di vakantie uitkering

Aruba ta pasando den un pandemia caminda miles di hende a perde nan trabou y gran parti di pueblo ta biba di un of otro yudansa.

Gabinete Wever Croes algun luna atras a dicidi sin dialoga y sin consulta cu sindicatonan, ta reduci salario y beneficionan di trahadornan publico, ya cu nan tin cu yuda cubri Fase cu ta yuda esnan cu a perde nan trabou den e pandemia aki.

Ora cu algun sindicato a protesta y hasta algun compania estatal a dicidi cu nan lo no sigui yuda den e fondo aki, Prome Minister a dicidi di cuestiona nan compasion y lealtad p’esnan cu no tin entrada ya cu tabatin mester di e placa aki.

Fin di luna di juni aki, Gobierno lo paga ‘vakantiegeld’ y como parti di e sacrificio cu Gobierno a pone trahadornan publico haci, ta cu e vakantiegeld di trahadornan publico, lo wordo reduci cu 50%, pues mita di e placa cu nan tabata haya pa hopi aña, lo wordo paga fin di e luna aki.

Pues e sacrificio di trahadornan publico ta grandi, pero na mes momento e mesun ambtenaarnan aki, mescos cu pueblo den su totalidad, por mira den ultimo dia y simannan, con varios Minister di e Gobierno demisionario, ta haciendo propaganda politico bou capa di anuncionan di Gobierno, caminda hasta e emblema di Gobierno ta wordo publica riba e avisonan politico aki.

Minister Presidente demisionario Evelyn Wever Croes mes ta usa e Plataforma di Crisis Team pa presenta su mes politicamente, caminda hasta den  presentacionnan na Tele-Aruba, ta logo di Gobierno ta wordo presenta.

Minister Dangui Oduber ta presenta promocionan personal cu emblema di Gobierno mas tanto ora cu papia riba e pandemia y proceso di vacunacion, mientras cu esun mas specifico sin duda, ta Minister demisionario Glenbert Croes.

Den un aviso publica dor di e mandatario por mira claramente e logo di Gobierno, mescos cu e discurso di lider di MEP den fin di siman cu a pasa, caminda claramente ta bisto cu ta usando medionan di Gobierno, pa hiba campaña politico.

Pa colmo net politiconan cu a pretende asina hopi di papia riba integridad, ta meti den e tipo di actonan cu ta costa Gobierno placa y aki tin menciona e mesun maniobra haci pa Minister Plenipotenciario demisionario Wilfred Besaril cu tambe a bin usa medionan di Gobierno pa promove su mes p’e proximo eleccion.

E cosnan aki ta costa placa, no ta fondonan di partido MEP lo paga e gastonan aki, pero ta fondonan publico, fondonan di pueblo, mientras cu ta mesun Gobierno aki a dicidi di insisti pa trahadornan publico sacrifica parti di nan salario y sigur mita di nan vakantieuitkering cu nan mester a cobra fin di e luna aki, te na mita.

E no ta husto y sin duda e ta un falta di respet grandi no solamente p’e trahadornan publico, pero pa miles di hende cu no ta gosando di un entrada husto n’e momentonan aki.

Increibel con Gobierno di MEP aki ta comete e tipo di actonan aki caminda semper a acusa otronan di corupcion, mientras cu e tipo di actonan aki, esta usando fondo di Gobierno pa paga propaganda politico, tambe ta un acto cu por wordo considera como corupto.