Siudadano a entregá apelashon lat i a pèrdè kaso di belasting

WILLEMSTAD – Ora un siudadano apelá veredikto den un kaso ku no a kai na su fabor, e mester ta mas kuidadoso ku nunka pa kumpli ku e tèrminonan legal di apelashon den Korte di Hustisia Komun.

E siudadano mester a bai Colombia urgente pa un operashon di wowo i tabatin testimonio di su dokter di wowo ku t’asina.

Sinembargo e persona mes i su apoderado a entregá e apelashon lat i Korte a rechasá tratamentu dje kaso.

Na momento ku a bira agudo ku e siudadano mester a hasi operashon na yuli 2019, e siudadano no a apelá ofisialmente ainda.

Pa kolmo e apoderado dje pashènt, kende a konsehero fiskal, tampoko a apelá ofisialmente.

E por a sikiera apelá Pro Forma pa keda ku derecho di entregá un apelashon.

Ta poko dia pasá Korte di Hustisia a duna veredikto den e kaso dje pashènt kontra Inspektor di Belasting.

E “corpus delictus” (sic!!!) mes ta trata na diferensia di opinion entre e siudadano i Inspektor di Belasting ku a manda kobr’é prima AVBZ di akuerdo ku su entrada anual di NAf 89.379 i NAf 92.362 respektivamente.

E siudadano a protestá, pero Inspektor a pone su apelashon un banda.

E siudadano a hiba Inspektor Korte i Korte di Hustisia tambe a pone su apelashon un banda.

Inspektor sí a manda su dokumentashon korektamente aden.

Dia 1 maart ultimo Korte di Hustisia a dikta veredikto huntu ku tur dokumento dje kaso.

Entre nan un e-mail di 27 di mei 2019 dje apoderado fiskal dje kliente pa puntra kon ta registrá un apelashon.

Griffier a splik’é tur kos: Kon i kuantu dia e tin.

Komo motibu pa e tardansa el a splika ku su kliente mester a bai Colombia urgente pa operá retina i ku dia 21 di oktober e tin ku operá atrobe.

El a manda prueba ku dr. Spencer a pidi pa manda su pashènt Colombia.

Dia 20 di yuli  e pashènt i su apoderado a retorná Kòrsou.

E pashènt a apelá, pasobra e no tabata di akuerdo ku e montante ku Inspektor a basa e prima di AVBZ, pasobra e tin yiu ta studia i tin gastu ekstraordinario di alimentashon pa su yiunan.

Korte a splika ku por inskribi apelashon kontra un veredikto e dia despues di un veredikto mes.

E pashènt tabatin tres luna pa registrá e apelashon, pero a warda te 14 di oktober ku ta rikamente lat.

Komo ekskusa el a splika ku su konsehero fiskal tabata foi tera.

Esei no ta kita ku e por a anotá apelashon Pro Forma via e-mail. E hecho ku ta dia 31 di mei 2019 el a haña sa kon ta apelá, ta pa su mes kuenta i Korte di Hustisia a rechasá su apelashon.