12 Partido lo entrega lista di candidato

Te cu ayera nochi, awe lo tin 12 partido politico cu lo entrega lista di candidato pa participa n’e proximo eleccion cu ta dia 25 di juni awor.

E prome partido cu lo entrega su lista ta Accion21 pa 9or di mainta. Accion21 ta participa na prome biaha. Pa 9.30 ta turno pa PPA entrega lista, sigui pa otro partido nobo cu ta Pueblo Prome.

Pa 10.30 ta turno pa RED entrega su lista, sigui pa 11’or UPP, e partido di Booshi Wever, pero cu un lider nobo. Pa 11.30, partido MEP lo entrega su lista y pa 12’or di merdia partido CURPA, tambe cu un lider nobo.

Pa 1’or di merdia, ta partido MAS, cu su lider nobo, Marisol Lopez Tromp. No tin mucha informacion si e ta entrega un lista completo. Pa 1.30 ta partido POR, cu tampoco lo entrega un lista completo manera den ultimo eleccion.

Pa 2’or partido HTC, cu ta un partido di hoben. Pa 3.30 ta turno na partido AVP. Unico partido cu lo haci uso di e-mail pa entrega su lista ta RAIZ.

Contrario na añanan anterior debi n’e pandemia, Conseho Supremo Electoral ta permiti 2 persona so na entrega di lista. E partidonan grandi sigur lo desea di wordo compaña pa nan siguidornan, pero manera a ser anticipa, lo no ser permiti pa evita aglomeracion.

Dialuna e partidonan cu no tin representacion den Parlamento mester pasa den proceso di haya firma di sosten. E partidonan cu mester bay den e proceso aki ta: Accion21, PPA, Pueblo Prome, UPP, CURPA, MAS, HTC y RAIZ. Nan cada un mester di mas o menos 600 firma di sosten y nan tin un siman pa logra esaki. E ora ey, nan por tin garantia di por participa na eleccion benidero.