Chris Romero den lapso di tres luna mal sirbi pa su lider Evelyn Wever Croes

Ta definitivo y manera cu AWEMainta a bin ta publica pa algun luna caba riba e futuro politico di Minister demisionario Chris Romero, kende ayera mainta definitivamente a kibra cu partido MEP.

E kiebro tabata na caminda pa algun tempo caba, ora cu a dicidi cu Romero lo no haya su number 3 riba e lista geel, pero lo wordo baha di rango y na prome instante a mustra riba number 6 riba lista.

Sinembargo ayera ora cu a bira conoci cu lider di MEP, Evelyn Wever Croes a dicidi cu e unico number habri cu e tin pa Chris Romero, kende tabata e politico mas importante pa MEP na San Nicolas, tabata te na number 18, cual tabata inaceptabel pa Romero.

Loke tin cu mustra aki t’e hecho cu den un lapso di algo menos cu tres luna, lider di MEP  na dos ocasion a perhudica Chris Romero formalmente, inicialmente ora cu el a dicidi di entrega retiro di su Gobierno na Gobernador, sin cu Gabinete Wever Croes a logra oficialisa San Nicolas Ports Authority NV caminda Chris lo mester a bira director segun palabracion.

Esaki a pone cu  Romero na lugar di bandona politica y drenta servicio di un compania estatal cu tabata wordo funda, mester a cambia tur su plan y anuncia cu e lo keda den politica y lo ta riba lista di MEP pa eleccion 2021.

Un cambio di idea cu no tabata den pensamento di e lider di MEP, kende ayera pa di dos ocasion sigui den un lapso di tempo asina cortico, a traiciona un politico cu a duna su partido un gran sosten na San Nicolas.

SAN NICOLAS

Loke ta remarcabel di henter e actuacion di lider di MEP, t’e hecho cu den mesun periodo cortico aki di dos luna, el a bula cabes di dos politico di San Nicolas, ya cu e hecho cu el a culpa su partner den Gobierno cu t’e lider di POR, Alan Howell, acusando esaki di no ta integro, awor ta benta otro politico di San Nicolas den olvido.

Pa colmo ta bin acerca cu Evelyn ta crea e impesion cu su partido aparentemente no ta gusta San Nicolas ya cu aña pasa e no a haci esfuerso algun pa mantene speransa pa CITGO cumpli cu contract pa pone e refineria di San Nicolas den funcion atrobe.

El a laga kibra e contract cu CITGO, loke a pone cu pa di tantisimo bes partido MEP ta laga cera e refineria y awor ta practicamente elimina dos politico popular di e bario di San Nicolas den un forma sin precedente.