Hospital orguyoso di e tremendo sosten y profesionalismo di tur personal

Ayera mainta Dr. Horacio E. Oduber Hospital a tuma despedida di e ultimo pashent di Corsou. Un momento sumamente alegre pa Hospital y mas ainda pe team di profesionalnan di HOH cu a traha incansablemente pa brinda cuido tur dia y den e caso aki a habri brasa pa pashent di  Corsou y Bonaire na comienso di april 2021.

Dia 3 di april e prome pashentnan di Corsou y Bonaire a drenta HOH. Team di profesionalnan di HOH a brinda cuido na un total di 9 pashent Covid-19 di Corsou y 2 pashent di Bonaire di cual tur a ser admiti riba riba cuido intensivo.

Edad promedio di e pashentnan interna di Corsou y Bonaire tabata 56 aña, di cual e pashent mas jong tabatin 44 aña y e pashent di mas grandi 75 aña. Tur e admisionnan aki tabata den transcurso di 1 siman, pues por imagina e impacto grandi cu e tabatin riba e profesionalnan den cuido na HOH.

“Ora cu e pregunta a drenta pa ta solidario cu nos islanan ruman nos no a duda pa habri brasa pa nan, aunke Hospital di Aruba mes tabata yenanando e momento ey cu mas pashent, asina dr. Benjamin Croes, intensivista na HOH a conta.  

Dia 1 di april Hospital di Aruba a anuncia cu den cuadro di solidaridad y humanidad ta saca un man pa nos islanan ruman Corsou y Bonaire cu ta pasando den momentonan sumamente dificil. N’e momentonan ey HOH a escala, habri mas cama pa pashent di Covid-19 cu consecuencia cu algun operacion electivo mester a wordo cancela. 

Ayera dia 6 di mei, Hospital orguyosamente por bisa cu tur operacion electivo a start bek y ta brindando tur e cuido necesario na nos pashentnan cu ta nos prioridad.

Hospital di Aruba kier a gradici Corsou y Bonaire pa’ confiansa y tremendo colaboracion den e momentonan dificil cu nos ta pasando aden.

“Ta un honor cu HOH por a extende un man y demostra hermandad den momentonan di incertidumbre y ta spera cu esaki ta comienso di mas colaboracion entre e islanan”, asina drs. Jacco Vroegop di Hunta Directiva a duna di conoce.

N’e personal di Hospital cu un bes mas a demostra cu nan ta un team di profesionalnan capacita yena di solidaridad y hermandad un danki di curason pa tur loke boso ta hasi pa pashent.  Aruba un bes mas a demostra di ta grandi!