Lourindo Nobrega a haña kastigu kondishonal pa molestiá hende muhé

WILLEMSTAD – Dia 5 di mei, atrobe e siudadano Lourindo Nobrega a presentá den sala di Korte pa motibu ku el a molestiá un hende muhé ku yamadanan telefóniko, whatsapp i facebook.

Den pasado kaba Nobrega tabata den sala di Korte p’e mesun delitu i e tempu ei tabata na aña 2018 ku hasta el a keda kondená pa a molestiá un otro hende muhé.

E akusado aki ta un siudadano di 38 aña di edat ku ta presta pa yama den oranan lat di anochi òf te hasta den madrugá pa trata na hasi avanse amoroso, ku kada biaha ta kai den mal tera serka esnan ku su bista kai riba dje pa molestiá.

Pa loke ta trata diarazon, den e kaso aki a akus’é di a molestiá un otro siudadano femenino durante un periodo di no menos ku kasi 3 aña.

Fiskal mr. Niks a spesifika e periodo 1 di desèmber 2016 pa 22 di ougùstùs 2019 durante kual el a buska kontakto i asina ei pone masha preshon riba e bida familiar di su víktima.

Dilanti di Hues Comisario i Polis, e akusado Nobrega a atmití ku enbèrdat e tabata molestoso durante sierto periodo ku e persona en kuestion, pero no ta kòrda tur e numbernan di telefon ku e sa uza.

Mas aleu el a atmití ku el a tuma nota ku e persona no tabata gusta su avansenan, pasobra e persona sa blòkia su numbernan di telefon i sa reakshoná masha rabiá riba intentonan ku e sa hasi.

Nobrega sa tin e maña di kuminsá ku su intentonan, stòp pa sierto periodo, pero bolbe sigi despues di algun tempu. Reclassering a konstatá ku Nobrega ta un persona ku un grado di inteligensia hopi abou, e ta mentalmente retardá i ta sigur un siudadano ku mester di guia profeshonal di un sikólogo.

Ta antisipá ku e chèns di ripitishon ta grandi. En realidat ta trata aki di un persona ku poko kontakto di manera ku su bida sosial a desaroyá di un forma hopi defisiente. A tuma nota ku hasta e sa manda pòtrètnan di su partinan íntimo.

Hues señora mr. G. Edelenbosch durante tratamentu di e kaso a para puntra Nobrega stret kiko ta su intenshonnan realmente, anto pakiko e no ta stòp na momento ku el a tuma nota ku e persona no ke tin nada di haber kuné.

Nobrega kasi no tabata duna kontesta. Abogado señora mr. Eisden, kende tabata enkargá ku e defensa di Nobrega a reklamá ku Polisnan a yama su kliente na sierto momento pa bini Warda di Polis pa interog’é, sin ku a pone e abogado na altura. Mas aleu segun e abogado, su kliente no ta komprondé bon loke ta konfront’é kuné, pasobra e ta un siudadano ku klaramente tin difikultat pa kapta loke ta pasando.

Hues a mustr’é ku den pasado kaba hustisia a persiguié p’e mesun delitu i aki Nobrega a reakshoná bisando ku p’esei el a pidi despensa na e víktima, ku kende nunka mas el a tuma kontakto. Finalmente Fiskal a proponé un kastigu di prizon di 1 luna kondishonal, mará na un periodo di prueba di 3 aña, mas un kastigu di trabou di 40 ora. I si e no kumpli ku e kastigu di trabou e lo keda enkarselá pa 40 dia. Hues a bai di akuerdo ku e demanda di Fiskal, pasobra den e kaso aki klaramente ta trata di humiliashon di un otro siudadano. Ounke e Hues no a haña un bista sufisiente kla di e akusado, Hues a mustr’é ku si e sigui komportá di tal forma lo e kai será sigur den futuro.