Prome Minister ta insisti cu ta ‘fake news’, sinembargo ta dificil kere cu tres aña sigui a bay entiero di Wiels na Corsou

Den un reaccion ayera riba red social, Prome Minister demisionario lo a denuncia e publicacion di “voorschot” riba prome pagina di AWEMainta, como “fake news.”

Na mes momento a publica un documento cu cual ta traha di hustifica pakico e voorschot aki a wordo usa y di con el a wordo usa.

Entre otro a pidi un voorschot pa lider di fraccion di MEP, cu ta su persona, como parti di ‘kennismaking’ cu Presidente di Parlamento di Corsou pa un suma di 459 florin riba e fecha di 23 di januari di 2013.

Tambe un voorschot pa un suma di 12.135,40 florin pa un ‘dienstreis’ pa Hulanda pa atende diferente reunion relaciona cu e raport cu a carga e titulo di ‘Feestvierend’  cual suma a ser pidi dia 14 di februari di 2013.

E di tres voorschot pidi na 2013 tabata pa un delegacion di fraccion di MEP den Parlamento, atende entiero di e politico Hernan Wiels, kende a wordo asesina na 2013 y aki ta trata di un suma di 946 florin y tur e tres puntonan aki a acumula e suma di 13.081,40 di placa di fraktiemedewerker cu a wordo usa.

Awor si AWEMainta ta publica ‘fake news’ anto tin cu mustra cu e lider di MEP tambe ta un ‘fake Prome Minister’ sigur mirando cu den e publicacion di diahuebs mainta, a publica dos transaccion cu ta data di 2014 y 2015 y ta dificil pa kere cu ta tres aña sigui a bay dera Wiels na Corsou.

Ta bin acerca cu tampoco por hustifica den un forma aceptabel, sigur ora cu Prome Minister a mustra cu e actual lider di POR falta integridad, cu a usa un suma di mas di 11 mil florin, pa entre otro biaha pa Hulanda pa bay parti un raport di partido MEP pa haci politica barata na Den Haag.

E raport Feestvierend ten Ondergaan no tabatin nada di haber cu interes general di Aruba, pero tabata un documento pa hunga weganan politico sin sentido caminda e resultado di e tipo di maniobranan aki, e propio Gabinete Wever Croes a sinti e consecuencianan di esaki.

Pues ningun momento a publica fake news ya cu ta documentonan cu por wordo haya den cuentanan anual di e fraccionnan y kisas lo no tin nada malo, pero pa acusa e lider di POR di  falta di integridad pa maneho di e placa di su fraktie, e ora Prome Minister tambe mester a percura pa no tin ningun tipo di maniobra tampoco di su parti.

Pero den e recibonan di 2014 y 2015 cu AWEMainta a publica riba su frontpage, ta mustra bon cla e fechanan di December 31 di 2014 y December 31 di 2015 un voorschot di 14.212.46 florin  na nomber di Mevr. E. Wever, pues no por ta trata di fake news.