A papia di cambio- y di problemanan grandi pero a presenta un lista chikito

Sin duda entrega di lista a percura pa hopi sorpresa, pero na mes momento hopi decepcion tambe ya cu claramente, sea consciente of inconsciente, por a tuma nota cu mayoria di e partidonan cu kier participa den e proceso electoral, no ta serio den nan intencionnan.

Varios lider di e partidonan cu a entrega nan lista ayera, a haci declaracionnan impactante te dramatico, entre otro cu e reto y problemanan cu pais Aruba ta confrontando, ta hopi grandi, pero ora cu analisa lista di e lidernan aki, simplemente nan preocupacion y determinacion pa yuda soluciona e problemanan nacional aki, no ta cuadra.

For di e prome partido cu a presenta su lista cu ta Accion 21, a mustra cu tin problemanan grandi na Aruba, pero sin menciona nan plan pa atende cu esaki pero mayoria a papia cu mester bin un cambio den e tradicion politico di e isla, cu pueblo mester eligi otro partidonan pa goberna e pais pero ora cu analisa nan lista, simplemente e ta confirma di con pueblo ta pone confiansa den e dos partidonan grandi.

Partido CURPA por menciona cu ‘no mas geel cu berde’ pero a presenta un lista di 8 candidato y sin duda un partido asina simplemente no ta capas di atende cu e problemanan nacional grandi cu tin.

Kisas e sorpresa di mas grandi tabata partido MAS, caminda tabatin un expectitiva grandi pa regreso di Marisol Lopez Tromp den politica como lider di e partido aki e partido a presenta un lista cu solamente 7 candidato, dunando un impresion cu no pa falta di tempo, pero pa otro circunstancianan tambe.

Partido RAIZ cu por poco a logra un asiento den eleccion di 2017, tambe a decepciona altamente ya cu e partido na 2017 cu solamente cinco candidato por poco a saca un asiento, pero ayera ora cu a spera cu den e ultimo tres aña y mey e partido lo a traha y sigui organisa su mes ampliamente, a presenta un lista cu solamente cinco candidato mas, esta pa un total di 10.

Lider di RAIZ tambe a papia di cambio, el a papia di intimidacion cu ningun hende a compronde di unda esaki ta bin, pero a mustra tempo a yega pa un cambio, no mas partidonan grandi pero ta con un partido cu 10 asiento, lo por presenta e solucionnan aki pa pueblo si e lista mes lo no produci un mayoria den Parlamento.

Tres partido no por a ni presenta 10 candidato y ta trata aki di HTC cu t’e partido mas chikito cu 6 candidato, sigui pa partido MAS cu 7 candidato y partido CURPA cu 8 candidato y entre nan tres nan ta logra 21 candidato hunto.

Partidonan cu a supera e cantidad di 10 candidato, pero a keda cu menos di 15 candidato ta un total di cinco cu tta partido Accion21, Pueblo Prome cu 12, RED Democratico cu 13 y partido RAIZ cu 12 candidato, pero aki tambe mayoria di e lidernan a papia di un cambio, a papia di kibra cu tradicion, pero si nan tin problema mas pa percura pa logra un mayoria riba nan mes den Parlamento, cu nan lista esey ta bira imposibel.

Por papia di un cambio, por papia di no mas mesun cos, pero na momento cu un organisacion politico no tin un structura ideal y concreto pa asumi responsabilidad pa dirigi e pais, ta dificil pa kere nan si nan mes no por atende cu presentacion di sikiera un lista cu pueblo ta mira seriedad aden.

Ora cu analisa e listanan cu e total di candidato riba nan, por mustra cu PPA-Transforma cu 17 y Pueblo Prome cu 12, por a traha un lista completo, mientras cu partidonan CURPA cu 8, MAS cu 7 y Accion21 cu 14,  por a forma un lista completo cu 29 candidato. POR cu tin un lista di 16 candidato hunto cu RAIZ cu tin 10, por a traha un lista combina cu 26 candidato mientras cu partido RED cu 13 candidato hunto cu UPP tambe cu 13, por a forma tambe un lista cu 26 candidato, na lugar cu awor tin un cantidad di partido cu no tin ni forsa pa para riba mes tanto den Parlamento como den Gobierno.