Entregamento di lista a percura pa varios sorpresa, pero hopi cu problema di tempo

For di mainta tempran por a mira movecion rond di edificio di Censo na Oranjestad, cu personal di medionan di comunicacion preparando nan aparatonan pa transmision directo, pero tambe presencia di cantidad di oficialnan di Polis bisti tur na preto, cual cantidad a sigui aumenta segun e oranan tabata pasando.

E prome partido cu a entrega lisa na oficina di Censo pa 9’or di mainta, tabata partido Accion21 cu ta participando pa prome bes na un proceso electoral y tabata lider di e partido, Miguel Mansur, kende a entrega e lista cu 14 candidato ayera mainta.

Pa 9.30 a toca turno na partido PPA-Transforma pa entrega lista y aki e lider Lisette Malmberg a presenta un lista di 17 candidato cu lo participa den e proximo eleccion.

C’un tiki tardansa partido Pueblo Prome a entrega su lista y esaki a wordo haci pa Michael Williams hunto cu Mireille Sint Jago (kende tabata riba lista di MEP) caminda e lista ta conta cu 12 candidato.

Di cuater partido cu a bin pa entrega lista di RED Democratico cual a wordo haci p’e lider Ricardo Croes hunto cu candidato number dos riba lista, esta Kinsasha v/d Bliek y e lista ta conta cu un total di 13 candidato.

Siguientemente a sigui partido UPP caminda e lider nobo, sra Seraida Pemberton-Leonard den compania di e candidato Raymond Hernandez, a entrega e lista di 13 candidato na oficina di Censo, mientras cu Booshi Wever a keda spera pafo hunto cu periodistanan n’e sitio.

Evelyn Wever Croes cu ta lider di MEP hunto cu Presidente di MEP, Hendrik Tevreden, siguientemente a entrega e lista di e partido geel y den declaracion haci despues di esaki, Evelyn a mustra cu MEP lo traha cu tur partido, menos cu AVP.

Partido CURPA a sigui caminda su lider nobo Eric Ras a informa cu tin 8 candidato riba lista ya cu ultimo ora varios candidato cu a wordo acerca a dicidi cu nan no kier drenta politica pa motibo di famia.

Kisas a sorpresa mas grandi den e proceso di ayera, a bira partido MAS bou liderasgo e biaha aki di drs Marisol Lopez Tromp, ya cu e expectativanan tabata hopi grandi, pero e partido solamente a logra di forma un lista cu 7 persona.

A spera un lista mucho mas Amplio, pero manera e lider di MAS a bisa, simplemente no tabatin tempo pa haci mucho cos.

Alan Howell despues a representa su partido POR pa entrega e listra cu lo participa den e proceso electoral y e lista tabata di 16 candidato, mientras cu den eleccion di 2017 e partido a presenta 29 candidato.

Despues di POR e lider di RAIZ, sr. Ursell Arends a presenta n’e sitio pa duna declaracion na prensa ya cu lista di su partido a wordo entrega pa medio di sistema digital, cual tambe tabata posibel.

RAIZ a presenta un lista cu 12 candidato cu ta cinco candidato mas cu loke e partido a presenta pa eleccion di 2017.

Penultimo partido cu a presensta su lista tabata HTC, un partido forma pa algun hoben y e lista cu ta consisti 6 candidato, a wordo entrega pa lider di e partido Gilbert Webb compaña p’e candidata Latoyer Briggs.

Ultimo partido pa entrega su lista tabata AVP cu a presenta apesar di tur peticion pa no bin cu mucho hende, c’un caravana grandi cu hopi bandera y musica, caminda dado momento hopi simpatisante a baha for di auto pa cana bay cu nan lider Mike Eman y señora pa entrega di e lista.

AVP a entrega un lista completo cu 29 candadato y p’e ocasion aki Mike a wordo acompaña pa Gerlien Croes y caminda tin cu mustra cu esaki tabata e unico ocasion cu a mobilisa practicamente tur Polis den besindario pa evita cualkier situacion di incomodidad.