Wardacosta ta informa tocante uso di harpoen y ‘gedoogbeleid’

Wardacosta kier tuma e oportunidad pa concientisa pueblo di Aruba y particularmente usarionan di lama, riba leynan vigente riba uso di harpoen.

Na november 2020 Gobierno di Aruba a introduci un asina yama ‘gedoogbeleid’ cual ta haci e uso di un harpoen den lama legal.

Sinembargo esaki ta mara na diferente condicion cu e usario mester tene su mes na dje. Un suplica ta bai p’e usuarionan studia e condicionnan aki bon pa por compronde kico ta permiti ora ta pisca cu harpoen.

Den caso cu un di e condicionnan aki wordo viola, e ‘gedoogbeleid’ lo no ta na vigor mas y e ambtenaar di Wardacosta of Polis por actua a base di e ley existente (landsbesluit verboden onderwaterjachtmiddelen).

Wardacosta kier a pone enfasis cu den e zonanan cora manera indica riba e mapa adhunto no ta permiti pa tira pisca y tampoco no ta permiti pa ta den posecion di un harpoen.

Unico excepcion pa posecion di harpoen den areanan cora ta si e harpoen ta poni den un boto p’asina por sali pa bai den areanan permiti of drenta bek.

Un persona no por sali for di cant’I lama y landa cu su harpoen den man p’asina e bay den e area cu ta permiti, vise versa tampoco no ta permiti. Pues cu otro palabra no por pasa landa den area prohibi cu harpoen den man pa yega tera.

Wardacosta ta tuma nota cu ainda tiramento di pisca ta tuma lugar sin cu tin un permiso p’esaki. Den diferente ocasion Wardacosta a actua debidamente riba esaki tambe.

Piscadornan cu ke haya un permiso pa pisca cu harpoen por bishita Sta. Rosa pa ricibi tur informacion tocante un permiso.

Wardacosta ta informa cu personanan cu ta mantene nan mes debidamente na tur e reglanan manera stipula den e ‘gedoogbeleid’ lo no haya nan mes den un situacion unda cu autoridad lo mester actua contra nan.