CTB ta felisitá Ajax ku su título di kampion di Nederlandse Eredivisie

WILLEMSTAD-– Djadumingu último 2 di mei, Ajax a logra su di 35 título di kampion di Nederlandse Eredivisie. Mirando e partnership entre Kòrsou i Ajax, Ofisina di Turismo di Kòrsou (CTB) a felisitá e ekipo di Ajax i tur e fanátikonan hasiendo uso di un aviso personalisá ku e teksto: “Ajax Pabien”.

E aviso di felisitashon a keda kompartí riba diferente plataforma di medionan sosial i tambe riba bòrchinan digital den sentro di Amsterdam.

E aviso ta inkluí tambe e wèbsite di Kòrsou pa tur ku mira e aviso por bishitá e wèbsite pa sa mas di e produkto turístiko ku Kòrsou ta ofresé.

Ademas huntu ku Ajax Life, e klup di fanátikonan di Ajax, ta rifa bou di e 88 mil fanátikonan un biahe pa Kòrsou pa 2 persona.

Manera ta konosí for di prinsipio di aña pasá, e logo di Kòrsou ta prominentemente visibel riba manga di e shùrt di Ajax.

Ademas pa medio di e promoshonnan ku ta keda hasí rond di e partidónan, tantu via televishon komo diferente otro kanalnan di Ajax, ta hasi posibel pa komo Kòrsou nos alkansá miónes di fanátiko di e klup na Hulanda i tambe rònd mundo.