Debe di facilidadnan ta parti di Lotto su contribucion na deporte

Lotto, bao maneho di Canadian Bank Note (CBN) desde 2012, ta keda garantisa fondo no solamente pa deporte y ganador, pero tambe cumpli cabalmente cu obligacionan financiero pa prestamo haci.

Cierto noticianan cu ta circula, manera entre otro cu e benta di loteria ta loke a wordo uza pa traha stadionan ta eroneo.

Manera conoci, na 2011, CBN a wordo pidi pa St. Fundacion Lotto pa Deporte conhunto cu Gobierno di Aruba, pa asumi maneho di un loteria cu tabata cerca di declara bancarota. Apesar di e risiconan financiero enorme aki, CBN a asumi e reto cu un plan di negoshi obhectivo y transparente cu e meta pa genera apoyo financiero na Fundacion Lotto pa Deporte, y tambe pa cumpli cu e deber p’e rescate financiero di un maneho cu no tabata faborabel p’e fundacion.

A base di un maneho profesional di Canadian Bank Note a logra hisa e benta averahe di Lotto na 45.6 miyon anualmente. Cu e fondonan aki e loteria ta cumpli cu prestamonan di pasado, mientras ta percurando pa deporte keda ricibi un sosten substancial.‎

Lotto a keda cu un debe grandi cu mester a busca financiamento p’e, na unda cu e stadionnan a crea un peso p’e loteria, un debe cu ainda Lotto ta pagando p’e construccion di e stadionnan aki. E debe aki, cu ta costa aproximadamente 2.1 miyon florin pa aña, tambe mester wordo considera como parti di e contribucion di Lotto na Deporte di Aruba.

Mescos ta conta riba e prestamo di 17 miyon cu St. Fundacion Lotto pa Deporte a sera cu Gobierno di Aruba na 2009 pa construccion di 3 compleho deporte y cu desde 2020 ta costa e fundacion un 1.5 miyon pa aña na pago na Gobierno. Cumprando Lotto bo ta contribui na deporte riba nos isla. E meta di e loteria ta pa organisa weganan di lotto, cambia bida di su hungadornan y na mes momento inverti den deporte local pa medio di donacion mensual na Stichting Sportsubsidie Aruba.