Den tempo corto GnC a logra facilita otro buelo humanitario

Den corto tempo Guarda nos Costa (GnC) a logra facilita un otro buelo humanitario pa Venezuela. Diasabra a tuma lugar e di nuebe buelo humanitario for di Aruba pa Venezuela. De facto, e buelo a sali for di Venezuela, a pasa Corsou, haci escala na Aruba y asina regresa Venezuela. Di e forma aki a transporta Venezolanonan pega na Corsou y Aruba, pa nan pais natal. 

E ultimo buelo humanitario tabata dia 27 di april 2021, pero no a logra transporta tur hende cu tabata pendiente pa regresa nan pais. Cu e buelo di diasabra a logra pa tur cu tabata riba lista por a regresa nan pais di origen. Entre nan tin cu djis a keda Aruba ilegalmente mas largo di locual ta permiti pa ley y tabatin algun cu a keda expulsa.

E buelo aki lo no tabata posibel sin cooperacion di Ministerio di Husticia di Aruba, Consul General di Venezuela na Aruba, Departamento di Aviacion Civil, DIMAS, Departamento di Relacionnan Exterior, IASA, Cuerpo Policial Aruba y Guarda nos Costa.

No por keda sin resalta e bon cooperacion ricibi di LabHOH cu a facilita e testnan di Covid pa tur cu mester a subi e avion pa regresa cas.