E vacuna ta dunando e resultado cu nos ta buscando

E enfoke principal di Minister Dangui Oduber durante e pandemia tabata dirigi riba maneha Covid-19 n’e mihor forma posibel, percura pa vacuna mas hopi hende posibel muy especial nos grandinan mas liher posibel pa despues por focus riba nos recuperacion di nos turismo.

For di momento cu na december 2019 a bira conoci cu e prome vacunanan di Pfizer y Moderna lo subi mercado, mi a sinti e urgencia pa prepara Aruba y busca mas vacuna posibel. E pandemia a haci nos tur hopi daño y na momento e solucion a presenta su mes, ta mi deber y obligacion pa haci uso di e oportunidad aki.

For di luna di december 2020 pais Aruba a prepara pa nos por ta cla pa ricibi e vacunanan. Henter un team multidisciplinario cu ta consisti di Ministerio di Turismo, Salud Publico y Deporte, Departamento di  Publico, BRA, DOW, IVA, VDA, KPA, Douane y Setar a bin ta prepara n’e mihor forma posibel pa ora e vacunanan yega nos ta cla pa cuminsa vacuna nos hendenan.

Mi tin cu bisa cu un team hopi dinamico a traha riba nos plan di ehecucion y tambe haci tur e preparacionan p’e bishita di RIVM.

RIVM a bishita Aruba pa haci e controlnan y supervision necesario riba nos plannan y tambe evalua esaki. RIVM a yega 25 januari 2021 y nan a haya un presentacion amplio di nos strategia di vacunacion, tambe di nos plan di ehecucion y con esaki ta hinka den otro.

A controla e freezersnan hunto cu tur e instalacionnan y henter e cold chain. Tambe a bishita tur e localidadnan caminda e vacunanan lo wordo duna y a check e transporte y seguridad.

Nos a percura pa Aruba tabata bon prepara pa manera e vacunanan yega nos por a cuminsa di biaha cu e distribucion.

Mi ta convenci cu e vacuna t’e solucion pa mundo y pa Aruba y hustamente p’esaki mi a haci tur loke ta den mi alcanse pa Aruba wordo vacuna. Esaki mi a pone como mi meta personal pa nos por logra hunto den union.

Mi a hiba un campaña hopi agresivo di informa, educa y consientiza nos comunidad di e importancia di tuma e vacuna. Manera aña a habri na januari 2021 nos a cuminsa cu esaki.

Nos a pidi Hulanda hopi vacuna desde december 2020, pasobra nos sa con importante e vacuna ta pa evita mas hende fayece, mas hende wordo hospitalisa y pa nos por progresa. Nos a negosha cu Hulanda firme y cu argumentonan nos por a convence nan pa manda nos mas vacuna. Nos a logra convence Hulanda pa manda mas vacuna pa nos considerando e cantidad di registracion cu nos tin,

E capacidad di duna vacuna cu nos tin, e eficiencia di nos proceso y tambe e cantidad di hende vacuna.

Nos a haci uso di e Aruba Health app, nos a busca un personal profesional, amabel y servicial.  Nos a aumenta nos capacidad pa vacuna pa dia te na 3000 vacuna pa dia y asina nos ta logrando vence e pandemia.

Awe nos ta wak con e cantidad di casonan ta bao di aun averahe di menos di 20 caso nobo pa dia. Nos ta wak cu na hospital tin solamente 3 persona interna den Departamento di Covid y 6 den ICU. 

Nos a percura pa vacuna casi 56.000 persona na Aruba y 70% di nos grandinan riba 60 aña di edad. Minister Dangui Oduber a demostra liderazgo, a demostra firmeza y dinamismo pa tin un di mihor programanan di vacuna di henter mundo. Awe nos ta mira cu e vacuna ta dunando e resultado cu nos tabata buscando.

Awor a yega e momento pa nos sigui flexibilisa, sigui suavisa y recobra nos libertad bek. Nos mester recupera nos turismo, nos economia y nos pais bek.

Mi ta sinti asina contento y orguyoso cu Aruba a responde n’e yamada pa vacuna y nos ta sintiendo e resultado di esaki.

Aruba ta bayendo den bon direccion , casonan ta bahando, cantidad di persona hospitalisa ta bahando, menos hende fayeciendo y nos turismo recuperando. Tur esaki ta danki n’e hecho cu mas y mas hende ta vacunando. Nos a demostra cu nos tin e curason na e lugar corecto, nos a maneha e pandemia y speed up e vacunacion.