Fiskal a preshoná saka informashon riba grupo ku a trese Colombiano

WILLEMSTAD – Den su rekisitorio den e kaso di eksplotashon humano na gran eskala ku a sosodé aki na Kòrsou, Fiskal señora mr. Emma de Groot a trese padilanti ku hopi énfasis ku e krímen mas teribel den e asuntu aki ta hasimentu di negoshi den trafikashon di hende.

Esaki ta un atentado bárbaro kontra libertat físiko i mental den e integridat di persona. Pasobra hende mester por konta ku full libertat den tur su konteksto i variedat.

E aktonan kastigabel kometé i ariba menshoná ta di e periodo ougùstùs 2016 pa òktober 2019, kontra di e Colombiano J.G. Parra Sandoval. Tabata señora Denise Augusta Velder, kende a aserká e víktima na Colombia ku e petishon pa kumpra su reseta di pizza, el a puntra klaramente kuantu ta kosta pa kumpra e resèpt di trahamentu di pizza i esaki a kontesta 3 mion peso Colombiano, esta 1000 florin.

A manda plaka Colombia pa laga esaki drecha su pasaporte i pasashi pa bini Kòrsou.

Na su yegada Kòrsou i momento despues ku e Colombiano a presentá serka famia Augusta pa bende e reseta a bis’é ku e por keda Kòrsou i ku tur siman lo sòru pa su kasá na Colombia risibí 300 florin.

Tambe a primintié ku mesora lo sòru pa regla su dokumentonan di estadia. E Colombiano a bai di akuerdo ku e palabrashon te asina leu.

Pero ta komo si fuera Jamiele Augusta i su kasá Denise Augusta Velder for di un prinsipio tabatin e plan pa di tal forma laga e Colombiano bin traha pa nan komo kòki den nan negoshi ku yama “Crazy Pizza”.

Den e deklarashonnan duná na Polis a sali na kla ku esaki tabata ideanan original ku a bini for di Denise Augusta Velder, ya ku e hòmber Colombiano, kariñosamente yamá ‘Memo’ ta oriundo di e señora aki tambe su bario, esta Santa Martha i tabata ku esfuerso di algun primu di Denise Augusta Velder kendenan a yuda pa por a lokalisá e Colombiano kòki.

Mas aleu a palabrá ku Harvey Bernadina ta bira partner di e negoshi di pizza ku nan lo lanta, despues ku a laga e Colombiano drenta aki komo turista.

E hòmber Julio Lijfrock, kende a bira tenedó di buki lo sòru p’e pèrmitnan nesesario p’e kòki, esta pèrmit pa trabou i estadia p’e hòmber Colombiano.

Enfin, segun Fiskal mr. Emma de Groot, klaramente a keda demostrá ku a engañá e kòki i asumí un aktitut di dominio riba dje.

Tabata via Western Union ku nan tabata manda plaka p’e hòmber tempu ku e tabata na Colombia i asina ei a gan’é pa bini Kòrsou.