FRAUDE ELECTORAL?

Pa: Armand Hessels

Di biaha despues di e anuncio di Conseho Electoral cu den e proximo eleccion e lo kier haci uzo di un sistema di scan pa reduci e riesgo di contagio y acelera e proceso di conteo, AVP a reacciona cu e acusacion cu ta trata di un intento di Gobierno pa salbaguardia su re-eleccion pa medio di fraude electoral.

Hasta despues cu Conseho Electoral/Director di Censo a declara den varios ocasion cu ta trata di nan propio iniciativa y cu di ningun manera por influencia e resultado, ni cu por averigua e eleccion di votador, AVP a sigui mantene su posicion.

CONSEHO ELECTORAL

Den henter e polemica aki por reprocha Conseho Electoral (CE) cu e, manera ta di custumber na Aruba, a trece un adaptacion importante den e sistema di votacion na ultimo momento den e discusion publico. Segun CE, e intencion tabatey pa varios aña, pero inesperadamente a haya mas urgencia pa motibo di e pandemia di Covid.

Riba dje e aceleracion inespera di eleccion a contribui n’e apuro pa adapta e Reglamento di Votacion dor di un Parlamento debilita cu n’e momento aki ademas te den e ‘modus di campaña’. Esey ta trece e riesgo cu n’e cu no ta analisa e proyecto debidamente.

OPORTUNISTA

Anke ta na su lugar pa critica e proceder aki, ta totalmente absurdo pa dun’e di biaha e etiketa di ‘fraude electoral’. Esey ta crea e impresion fuerte cu e partido concerni ta probecha di e oportunidad aki pa, mescos cu ex-Presidente Trump, ‘splica’ di antemano e perdida electoral anticipa. Esey ta logico: Cu un Ministro cu a keda sentencia pa Corte den prome instancia pa corupcion y participacion na un organisacion criminal (caso-IBIS); un otro ex-Ministro cu t’e sospechoso principal den un caso di corupcion extenso di cual su compinchinan hustamente den e periodo aki (t)a keda encarcela pa un tempo cortico of mas largo (caso Avestruz); y otro ex-exponente importante cu inicialmente como Ministro di AVP y despues di POR tambe ta suheto na investigacion hudicial (caso Flamingo), AVP na e momento aki no ta inspira ningun tiki di confiansa n’e electorado.

Consecuentemente e acusacion di AVP na Ministerio Publico cu aki ta trata di ‘persecucion politico’ ta disparate completo.

ETCETERA

Pero tambe e enrikecimento vergonzoso di otro ex-Ministro, entre otro pa medio di e aventura fracasa di Citgo; e secrecia hermetico pa cu e contrato di Citgo; e gastonan enorme di e fracaso grandi den caso di e hedge-deal; e desbordamento espantoso y inaceptable di finansa publico y consecuentemente di e debe publico; e obligacionnan enorme como consecuencia di e proyectonan intransparente di PPP, etc. ta contrubui n’e imagen negativo di e partido.

A base di esey ta dudoso si AVP tin algun credibilidad moral ainda pa denomina e iniciativa di Conseho Electoral como fraude electoral.

Pesey tambe e acusacion ey maximo por aporta na reaccion emosional dentro di e propio nucleo di fanatico, mientras cu alabes e por kita e atencion di comunidad for di e casonan di corupcion.

LABAMENTO DI PLACA?

Pa por recobra algun confiansa, ta necesario p’e partido bira completamente transparante riba un termino mas cortico posibel. Pa cuminsa cu e lider di partido cu mester duna un splicacion satisfactorio p’e contribucion di parti di Roberto Rincon na september 2016 di US$ 49.950 na su fundacion di campaña.

A aresta sr. Rincon ya caba na december 2015 na EEUU pa motibo di corupcion/labamento di placa. Na juni 2016 Rincon a admiti su practicanan coruptivo di mas di US$ 1 biyon (mil miyon!) pa medio di PDVSA den combinacion cu labamento di placa.

Pesey tambe nos Prome Ministro di e tempo ey mester tabata na altura di e reputacion cuestionabel di Rincon. Pues e mester por a conta riba su dedenan cu e suma(nan) cu el a ricibi di Rincon probablemente tabata resultado di delito (corupcion). Pesey tambe lo por considera e uzo di e placa aki, comosifuera a ricibi’e legitimamente y su uzo pa meta personal (campaña), como labamento di placa.

Como cu mas exponente di AVP tambe a ‘deal’ (intensivamente) cu Rincon pa motibo di otorgamento di tereno y ‘negociacion’ tocante e refineria, lo no ta nada straño si e miembronan di partido ey tambe a ricibi suma substancial riba nan cuenta di campaña. Como tal AVP lo por a comporta su mes como un machin di laba placa.

Pasobra e sumanan aki ta procedente di un pais cu ta considera internacionalmente como sumamente corupto te n’e nivelnan di mas halto. Sinembargo, segun e percepcion di su propio pueblo pa medio di encuesta di Banco Central, Aruba no ta mucho diferente. Den e cuadro aki e recien ‘Aruba Money Laundering Report 2021’ tambe ta mustra riba e abuso di poder di parti di Ministro y otro funcionario publico.

Den esey Parlamento no lo ta dispuesto pa investiga esaki seriamente si e lo afecta e posicion di nan propio Ministronan.

TRANPARENCIA

Como cu ta trata di sospecho serio, den e cuadro aki ta importante pa partido AVP duna transparencia total den administracion di e fundacionnan concerni. Pa un partido cu (mientras e ta den oposicion!) ya caba for di comienso di añanan ’90 ta boga pa transparencia den financiamento di partido, esaki ta un oportunidad unico. Posiblemente esaki lo por yuda e partido na saca e sospecho di fraude di e electorado for di mundo.