Kaso maratoniko den Korte…..Trafikashon humano i eksplotashon bárbaro

WILLEMSTAD – Suela di sala di Korte a sakudí pisá siman pasa un biaha mas na momento ku e siudadano ku un tempu tabata Landsreshèrshi, esta Jamiele Augusta, a presentá den sala di Korte akusá di trafikashon di hende, falsifikashon di dokumento i eksplotashon bárbaro di un Colombiano ku tabata ilegal na Kòrsou.

Siendo un Landsreshèrshi, e hòmber Jamiele Augusta di 52 aña di edat tabatin un negoshi di pizza “Crazy Pizza” riba Caracasbaaiweg ku e tabata manehá huntu ku su kasá di orígen Colombiano, kende yama Denise Augusta-Velder di 40 aña di edat.

Ademas t’asina ku Jamiele su primu ku yama Harvey Bernadina i di 47 aña di edat tabata partner den e negoshi, siendo Julio Lijfrock (aktualmente bibá na Hulanda) i di 52 aña di edat t’e tenedó di buki.

Tratamentu di e kaso aki tabata uno maratóniko, el a kuminsá mitar di 10 di mainta i a kaba te 6or di atardi (8 ½ ora di durashon) i tabata dirigí pa Hues mr. G. Verbeek. Fiscal na nòmber di Ministerio Públiko tabata señora mr. Emma de Groot.

E abogadonan pa hiba defensa tabata señora mr. Alicia Blonk p’e akusado prinsipal Jamiele Augusta,

señora mr. Atena Sulvaran pa Denise Augusta Velder, señora mr. Marije Vaders pa Harvey  Bernadina i

señora mr Paula Janssen tabata enkargá ku e defensa di Julio Lijfrock.

Siendo e doño prinsipal di e pizzeria i alabes reshèrshi, e akusado Jamiele Augusta a presta pa pone un Colombiano ku tabata pèrmanesé ilegalmente na Kòrsou traha pe durante 3 aña, 7 dia den siman, tur dia di entre 12 pa 15 ora.

Despues di e denunsia ku a keda hasí, rápidamente hustisia a pasa over pa detené Jamiele Augusta, siguí pa su kasá Denise Auguta Velder, e partner den negoshi ku tabata e primu Harvey Bernadina i finalmente for di Hulanda a laga trese e tenedó di buki, esta Julio Lijfrock pa un periodo kòrtiku Kòrsou.

LITANIA DI DELITO

E kuarteto ta akusá di hasimentu di negoshi di trafikashon di hende, kontrabanda di hende, falsifikashon di dokumentu i violashon flagrante di orarionan di trabou.