Ocho partido ta inicia proceso awe pa haya sosten pa participa den eleccion

Despues cu diabierna ultimo un total di 12 partido politico a entrega lista di candidato na Censo, awe ta inicia cu e proceso di busca firma di sosten pa por participa den e proceso electoral di otro luna 25 di juni.

Segun Ordenansa Electoral articulo 17, partidonan politico cu no tabatin asiento den Parlamento, mester busca un sosten di 587 forma di votadornan, cu ta un porciento di votonan valido di e eleccion anterior p’asina por wordo permiti pa participa den e eleccion di otro luna.

E periodo di recoleccion di firma lo tin un duracion di shete dia di trabou, cu ta inicia awe dialuna 10 di mei for di 10’or di mainta te cu 8.30 di anochi y lo termina diamars

18 di mei pa 8.30 di anochi.

E centronan caminda hendenan por firma ta pa dependance Censo na LG Smithboulevard 66, tambe na Hoofd Bestuurs Kantoor den edificio di MFA na Noord y tambe na Hulp Bestuurs Kantoor den edificio di MFA na Savaneta.

Esnan cu ta bin firma mester presenta un documento di identificacion valido p’asina nan firma ta valido n’e partido pa cual nan ta duna nan sosten.

Ocho partido tin mester di e sosten aki, ta partido MAS, CURPA, Accion21, UPP, Pueblo Prome, Raiz, PPA Transforma y HTC caminda e partidonan cu no logra na haya e cantidad di firma menciona, lo keda for di e proceso electoral.

Ningun di e partidonan aki, a presenta un lista completo diabierna ultimo caminda e partido cu mas candidato a presenta riba su lista, tabata PPA Transforma cu 17 candidato, mientras cu Accion21 tin 14 candidato sigui pa UPP cu 13, Pueblo Prome cu 12 mescos cu Raiz cu tambe tin 12, mientras cu dos partido no por a yega na 10 candidato, cu ta partido MAS di Marisol Lopez Tromp cu tabatin 7 candidato, mientras cu HTC a presenta un listra cu solamente seis candidato.

Ora cu analisa e listanan aki, e ta duna e impresion cu tur e partidonan aki, cu ta inicia e proceso awe pa coleccion di firma, ta buscando pa purba saca un of dos asiento pa di e forma aki busca pa drenta un Gobierno di coalicion, caminda lo bay haya mesun situacion cu tabatin ultimo tres aña y mey cu ta tras di lomba.

Tur ta papia riba cambio, tur ta papia cu tin problemanan grandi y di bon gobernacion, pero ningun a presenta suficiente “tools” politico den un lista grandi cu ta sigura un Gobierno stabiel tanto den Parlamento como como Gobierno, ya cu realmente nan no a prepara nan mes p’esaki.

Ya caba a keda demostra ultimo periodo di gobernacion cu e Gobierno di coalicion di MEP-POR-RED, tabata tres Gobierno den uno, caminda e poder inicialmente tabata sinta cerca tanto partido POR cu solamente dos asiento y despues cerca partido RED cu solamente un asiento.

E poder tabata den nan man y ora cu mira e partidonan cu ta buscando sosten pa participa den eleccion di otro luna, e ta un antesala p’e tipo di Gobierno aki, caminda pueblo lo no wordo sirbi pero mas tanto pueblo lo wordo strobe den su desaroyo y su progreso.