Xpresa bo mes. Tin un partido politico nobo: OM

Pueblo mester ta alerta, tin un Partido Politico nobo, esta OM! Comentario general den e dianan aki cu ta circula den nos comunidad ta un Ministerio Publico (OM) ta bolbe trata na afecta e proceso democratico, esta eleccion di Aruba.

Hustamente dos luna prome cu eleccionan di 25 di juni ta inicia cu un investigacion cu tin dos aña drumi, p’asina trata na colga un candidato fuerte di AVP, esta sr. Benny Sevinger net prome cu eleccion. Unico conclusion cu por saca di e maniobra nan aki ta cu ta OM ta ser usa como un vehiculo politico p’asina posiciona MEP mihor pa juni benidero.

AVP tin cu bringa contra MEP, RAIZ, POR, PPA etc, pero awor tambe contra OM. Casi por bisa un otro partido politico. Esaki ta un golpi atrobe pa nos estado di derecho. Esaki a sosode exactamente igual 4 aña pasa unda Paul Croes a wordo sera net un luna prome cu eleccion di 22 september 2017 p’asina afecta e resultado di eleccion na Aruba.

E momento ey a sera Paul Croes 86 dia den isolacion p’asina e no por tabatin ningun contacto externo. E draaiboek a wordo saca atrobe e biaha aki pa Benny Sevinger. 

Pueblo mester ta alerta pa cu esaki y no bolbe cai den trampa di OM y MEP den esaki. Nos redaccion a alerta comunidad prome cu e prome detencion den caso di Avestrus cu esaki lo sosode y esaki a sosode manera cu nos a bisa.
Un Gobierno nobo mester haci un limpiesa y investigacion contra esnan na cabez den OM y tambe den Landsrecherche, pa mira kico te causa di tanto desbalance inhustifica na banda di e partido geel.

Cu mester investiga TUR caso si, pero no di un banda solamente nos ta reitera, dunando un solo partido e facilidad pa gana un eleccion. Aki bo ta metiendo directamente den nos sistema democratico. E gran pregunta ta PAKICO.

No por t’asina, cu den un forma asina brutal y sin cuero di cara OM ta laga su mes wordo usa politicamente di e forma aki.