Accion21 a completa e firmanan rekeri pa bay eleccion 2021

Ayera Accion21 a colecta e firmanan necesario pa participa den eleccion dia 25 di juni 2021. Lider di partido Miguel Mansur hunto cu e 13 candidato riba e lista a gradici un y tur cu a firma pa duna Accion21 e oportunidad pa trece cambio, progreso y mehoracion pa Aruba.

E team a bishita e tres localidadnan pa firma Censo, MFA Noord, MFA Savaneta y apenas den e di dos dia di coleccion di firma, nan a surpasa e cantidad oficial pa sigui e caminda pa eleccion. Esaki ta demostra cu pueblo kier un partido nobo, un partido progresista y liberal pa para pa nan.

Accion21 ta preparando su mes pa presenta e programa di partido y asina cuminsa e campaña p’e eleccion benidero. Nan ta bay haci uzo di un combinacion di e plataforma digital y tambe sali riba caya pa combersa cu pueblo cumpliendo cu e medidanan estableci di Covid-19.

E lista di Accion21 ta integra pa 14 candidato cu experticio den diferente area, pero cu ta lucha p’e mesun meta, hiba Aruba dilanti.

OTRO PARTIDONAN

E prome partido cu a logra su firmanan, ta MAS di Marisol Lopez Tromp ya for di dialuna anochi y ayera mainta tabata partido RAIZ di Ursell Arends cu a logra e cantidad di firma necesario. Awor ta keda pendiente UPP, PPA-Transforma, HTC, Pueblo Prome y CURPA.