Ministerio Publico ta insisti pa forma parti di maniobranan politico

Cu gran sorpresa Ministerio Publico a anuncia diabierna siman pasa, cu el a ricibi copia di e raport di “Forensic Services Caribbean, cual raport a wordo traha riba peticion di Conseho di Comisario di Refineria di Aruba NV, relaciona cu maneho financiero hiba pa gerencia di e compania.

E ta un sorpresa ya cu ta lanta e pregunta di con Ministerio Publico, cu ta ricibi cantidad di raport, ta anuncia cu el a ricibi esaki, pero den otro casonan e no ta ni menciona of  duna publicidad n’esaki y como tal e ta mustra di ta otro indicacion dor di Ministerio Publico, di kier forma parti di maniobranan politico.

Ta bon pa mustra aki, cu Ministerio Publico no ta papia cu e Conseho di Comisario actual di RDA, a entrega un keho oficial cerca e institucion aki y e mesun raport a wordo entrega na Parlamento, pero ningun caminda ta papiando di lo inicia c’un peticion oficial pa investiga e caso aki.

Ki mishi Ministerio Publico ta anuncia cu e lo studia e raport y lo bay dicidi despues si ta trata di hechonan castigabel y kende lo wordo marca como sospechoso den e caso aki, pero en realidad esey no ta trabou di Ministerio Publico, pero ta bin resulta cu Ministerio Publico ta bira mucha manda di e Conseho di Comisario di RDA, ya cu ta e conseho aki t’esun cu ta supervise e maneho di gerencia di RDA y ta nan tin cu determina si e ex Director a hiba un maneho contra reglanan existente y e ora Conseho di Comisario tin cu entrega un keho oficial na Ministerio Publico.

Awor Ministerio Publico ta actuando net “andersom” ya cu ta nan ta bay studia e raport pa despues mira kendenan lo bay over na detene den future, mientras cu e actual Gobierno di MEP, ta sigui trata di usa e raport aki como asunto politico pa campaña.

Ta mas cu claro cu hopi hende ta kere cu Ministerio Publico ta maniobrando pa algun aña caba den e arena politico, ta actuando den un forma asina bisto dunando e impresion cu nan ta sirbiendo un of otro interes politico y ta algo cu simplemente no ta su lugar y ta algo di condena severamente.

Na mes momento e declaracion di Ministerio Publico aki cu e lo bay studia e raport forensico di RDA, ta confirma cu e Conseho di Comisario di e compania aki ta incapacita pa haci nan trabou mientras cu ayera mainta fraccion di MEP a caba di confirma cu henter e raport aki ta un tipo di circo politico orkestra pa un Gobierno di MEP.