Aruba Lions Club ta lansa un disco compacto pa recauda fondo

ALC Band a wordo lanta despues cu Aruba Lions Club a organisa algun aña atras un actividad pa nos grandinan den e temporada di maart nos dia nacional, y a bay celebra den casnan di nos grandinan pone ambiente y reparti snacks cu cos di bebe pa tur presente incluyendo tur trahador di e casnan aki.

Despues di esaki e banda a sigui practica pa amplia su repertorio y asina a presenta tambe na algun actividad di otro clubnan di servicio riba nos isla.

Na 2019 e grupo aki a biaha cu algun otro miembro di ALC pa Orlando caminda tur aña ta tuma lugar un conferencia caminda tur e clubnan den nos zona ta participa cu ta Florida, Bahamas, Aruba, Bonaire y Curacao.

Aki e peticion a drenta pa ALC Band por presenta e aña aki 2021 atrobe y p’esaki a cuminsa prepara un repertorio y alabez drenta studio pa cuminsa graba un produccion musical.

E problematica di e pandemia a haci cu e grabacion y preparacion a tuma poco mas tempo cu normal a na februari 2021 a finalisa e proyecto aki.

Mientrastanto a keda warda e luna di april pa biaha pa Orlando p’e conferencia aki, pero lamentablemente esaki no por a continua mirando cu e situacion di e pandemia no a duna e oportunidad pa haci esaki.

Aruba Lions Club Band a warda e momento oportuno yega awor p’asina lansa e CD aki cu 12 tema musical varia cu musica clasico, popular conoci pa mayoria y toca den estilo tipico Caribense manera; Potpuri di merengue, Señorita di Pietermaai, Jambalaya, Calypso Medley, Cerezo Rosa / Solamente una vez, Potpuri di tumba, Dugu Dugu, Joe, El Bodeguero, Yellow Bird / Jamaica Farewell, Basha awa bai, Mi esposa.

Hunto cu e produccion aki a logra pa graba un videoclip cu lo sirbi tambe pa promove e disco aki local y internacionalmente serka e otro Lions Clubnan den exterior.

Esaki por ser mira libremente riba nos pagina di facebook of tambe riba youtube.

E contribucion p’e CD aki ta solamente 25 florin y bo ta ricibi un CD pa alegra bo hogar, bo negoshi of toca den bo auto, pa regalo y alavez ta contribui cu ALC unda cu bo aporte ALC por sigui yuda nos comunidad.

E CD aki ta obtenibel serka tur miembro di Aruba Lions Club y por contact nan tambe via e pagina di facebook na Lions Club of Aruba.

Por manda un whatsapp na 730-1214 y laga bo nomber y adres y nan por yega pa deliver esaki.

Aruba Lions Club ta aprecia cada un contribucion y ta sigur cu abo lo aprecia e dushi musica.