Bearingpoint a demandá Gobiernu di Sint Maarten pa 15 mion florin

WILLEMSTAD – Den siman ku a pasa, e kompania konsultador BearingPoint ku un dje aktual direktornan di Banko Sentral di Kòrsou i Sint Maarten, Ribeiro,  a yega di traha pa nan pa regla benta di un kontrat di programa di kòmpiuter ku gobiernu di Kòrsou, a pèrdè un kaso multimionario kontra Gobiernu di Sint Maarten kual a revoká palabrashon pa kumpra un programa grandi pa organisá un sistema di belasting nobo ku lo a saka su plaka ‘dubbel en dwars’.

Tur kos tabata palabrá, tur aprobashon por habida i por haber gobiernu a duna den su palabrashon ku Bearingpoint i un otro kontratista a un total di 75 mion florin pa ora gobiernu  a kambia riba e isla, nan a kibra nan palabra i a para e proyekto.

Komo 75 mion florin no ta kualke ‘yu di mama’ e dos Bearingpoint na Korsou i un otro kompania na Sint Maarten a hiba gobiernu Korte pa rekuperá e plaka ku nan a hinka den e proyekto ku lo a bai produsi muchu mas entrada pa gobiernu di Sint Maarten.

Pero pa legal ku e kontrat tabata, korte a duna veredikto siman pasá ku no por obligá gobiernu di Sint Maarten pa kumpli ku e kontrat pasobra si no tin sèn, no tin i no por ranka plaka for di un baka flaku.

Hecho ta ku e palabrashon pa kumpra un programa di belasting pa 75 mion florin definitivamente lo a benefisiá Sint Maarten, pero gobiernu di Sint Maarten ta den clinch ku Hulanda i nan no tin plaka.

Raymond Knops a sera kranchi di plaka snòk snòk i ounke Hulanda a bai di akuerdo pa habri e kranchi, te ainda e plaka no a pasa.

Di manera ku  BearingPoint i e kompania sosio den proyekto a bai Korte pero no a haña rason.

E historia a kuminsa na yuni di 2017 ora gobiernu a tene un destaho pa kumpra un sistema outomatisa di kòmpiuter pa Belasting. E komishon di evaluashon a repasá e oferta  di Bearingpoint i a informá nan ku nan proposishon a skore esun mihó i ku nan ke kuminsa negosha riba e detayenan mas pronto posibel.

E proyekto yama  ‘Plan van aanpak Belastingtrans formatie Sint Maarten’  ku tabatin komo meta pa subi entrada di belasting di 21,5% di Produkto Bruto Nashonal pa 23%.

Ya Kòrsou i islanan BES ta traha ku e sistema aki ku bon resultado. Te ku a menshoná fecha ku e proyekto ta drenta den funshon.

A presentá e plan den Konseho di Minister di Sint Maarten na maart di 2019 i a kumbini ku e programa ta komisnan aprel 2019 i lo nombra un gerente di programa mas pronto posibel.

A tuma desishon ku ta bai laman ku BearingPoint pe proyekto ku ta kosta na tur 61 mion florin pa edifisio i tur fasilidat i pe parti di kòmpiuter ta kosta 15 mion florin i komishon a aprobá e plan.

A bisa ku a traha presupuesto pa e plaka  i a diskuti esaki ku Hulanda.

Hulanda a haña e proyekto asina importante ku nan priminti di yuda paga pe basta CFT aprob’é.

A outorisá Minister di Finansa pa ‘trèk’ e plan i pa nombra un gerente dje proyekto.

Gobiernu a manda karta pa BearingPoint i e otro kontratista ku tur kos ta kla i nan ta sinta warda ku ansha riba e akuerdonan pa por dal bai.

ESEI TABATA 18 NOVEMBER 2019

Dia 20 di februari 20202 e Minister nobo di Finansa a manda bisa BearingPoint ku nan a para e proyekto pa mas investigashon apesar ku CFT a manda bisa pa pura ku e plan pasobra e ta bon pa Sint Maarten.

Simplemente e gobiernu nobo a deklara ku nan no por sigi ku un proyekto dje anterior gobiernu.

E karta ku e anterior gobiernu a manda bisando ku tur kos ta kla, tabata un vupá enorme pasobra presupuesto tin buraku mes grandi ku krater riba luna.

KONTRATISTA TA DAL BEK

E dos kontratistanan dje proyekto no a laga tempu pasa i a dal bèk mesora: kumpli ku e kontrat dor paga 10.000 florin pa kada dia ku nan no kumpli.

Korte no a konsedé e kontratista su petishon pasobra no tabatin purá pa finalisá e kontrat i ku si gobiernu a faya, por demanda nan den Korte Civil.

Pero ku awor no ta oumento pa obligá nan paga, pasobra nan no tin sèn. Komo e partido ku a pèrdè e kaso, BearingPoint i e otro kontratista tin ku paga e gastunan dje proseso.