Decision riba scanner no tin nada di haber cu pandemia

“Vox Populi, Vox Dei”, esta bos di pueblo ta bos di Dios y ta den e cuadro ey tin cu mira henter e proceso democratico di eleccion di un pueblo di Aruba, caminda semper a mira e derecho aki como un derecho sagrado.

Nunca den historia di e proceso electoral di pais Aruba, a yega di haya un situacion caminda cu esaki a wordo menasa pa intento di fraude y nunca a duda den e proceso cu a guia eleccionnan pa decadanan largo.

Awor di repente un Gabinete Wever Croes cu no a cumpli cu ningun promesa haci na pueblo, cu a suta pueblo cu cantidad di medida caminda hasta despues cu e Gobierno aki bay cas, ainda tin mas medida cu Prome Minister Evelyn Wever a acorda cu Hulanda, lo drenta na vigor.

Pues pueblo no solamente ya caba a wordo castiga den mal forma cu medidanan sin misericordia pero ta keda c’un herencia di medida acorda pa Prome Minister y Minister di Finsansa y Economia.

For di nada di repente a lanta e pensamento di e Gobierno demisionario, cu lo bay introduci uso di scanner pa contamento di voto, caminda e sistema cu kier usa, ta viola e secrecia di e votador sin cu esaki ta necesario.

Tanto Presidente di Conseho Electoral Glenn Thode como Prome Minister Evelyn Wever Croes, nunca por a hustifica uso di e scannernan aki y ta mas cu claro cu e unico partido den oposicion, cu ta AVP, pa medio di su lider Mike Eman, a hiba un lucha tenas pa evita cu ta bay usa e scanner aki.

Miembronnan di fraccion di AVP un nuebe en total, hunto cu e miembro independiente Daphne Lejuez y tambe Parlamentario RED, Ricardo Croes a sostene e carta aki cu a wordo entrega na Gobernador di Aruba y na Parlamento, pero tambe a wordo manda pa Tweede Kamer riba e intento di fraude cu e scannernan.

Den oranan lat di diarason atardi Prome Minister oficialmente a informa cu lo no haci uso di scanner den e eleccion di otro luna, loke sin duda tabata un alivio grandi den pueblo caminda principalmente nos hendenan grandi, tabata masha incomodo cu e tipo di maniobra aki, cu ningun momento por a wordo hustifica pa Gobierno of pa Presidente di e Conseho Electoral.

Realmente nunca e asunto aki mester a bin riba mes asina cerca di un eleccion ya cu Glenn Thode mes a mustra cu ta for di despues di eleccion di 2017, a menciona cambionan cu lo kier introduci den henter e proceso aki, pero nunca esaki a wordo ehecuta.

Es mas, pa cualkier cambio di ley, mester di aprobacion di Parlamento y esaki ya no tabata posibel, despues cu Evelyn Wever Croes mes a baha su Gobierno.

Y asina mes hunto cu  Glenn Thode kier usa scanner, cueste loke cueste, ta mustra di dictadura y sigur nada di democracia.

Votamento ta un derecho sagrado di un pueblo liber y cualkier cambio, cualkier decision cu por afecta e derecho aki, tin mester di aprobacion di pueblo y sigur di Parlamento loke e scanner aki no ta conta cune.

Menciona cu esaki tin di haber cu e peliger di contagio di covid-19 anto mester a suspende henter e eleccion ya cu e peliger di contagion ta tur caminda, tambe ora cu politiconan ta bishitando casnan den barionan.

Por bisa awe, cu eliminacion di e scanner, democracia a gana atrobe.