Music Exposure ta bolbe Cas di Cultura

Music Exposure, ta un programa cu Cas di Cultura a inicia desde juni 2020 pa duna aliento y alivio na musiconan di Aruba pa medio di conciertonan chiquito. Tambe dunando alivio na publico den momentonan di ansha.

Music Exposure ta regresa na Cas di Cultura! Un serie di concierto cu desde juni 2020 a expone publico na talento musical local y a duna aliento tanto na musiconan como publico y Cas di Cultura mes cu tambe a ser afecta dor di Covid-19.

Musiconan cu a forma parti na 2020 tabata entre otro Armand Simon, Michelangelo Koolman, Chris Kross, Carlos Bislip, Reno Steba, Stephen Diaz, Camilo Bastidas y mas pa un total di 9 concierto exitoso.

Diadomingo awor dia 16 di mei, Music Exposure ta bolbe cu Kyle Winklaar Trio, cu ta consisti di Kyle Winklaar riba grand piano, Jeremy Bonariba riba percusion y Reno Steba riba baho. Nan repertorio ta enfoca riba composicionnan propio, esta di Kyle Winklaar y Reno Steba, cual ta fusionnan di generonan Africano, Latino y Europeo.

Por yama 569-3304 pa reserva of cumpra bo ticket. Aporta na nos medio cultural y nos musiconan.

Cas di Cultura ta tene su mes na tur medida di DVG pues corda bin cu bo tapaboca tambe. Capacidad di stul ta limita na 150. Tin mas Music Exposure na caminda, pues keda tira bista riba pagina Facebook di Cas di Cultura y www.casdicultura.aw pa bo busca bo carchi na tempo. Pueblo ta invita pa bin scucha musica y disfruta di un momento ameno y positivo.