Direktor di Juliana Airport por reanudá su trabou inmediatamente

PHILIPSBURG – Esaki ta di dos kapitulo dje drama ku a ser inventá na Sint Maarten rond di retiro dje direktor legitimo Brian Mingo kende ta kompletamente rehabilitá den su funshon komo Direktor di Aeropuerto di Sint Maarten for di antayera.

Promé ku esei, a toka n’e komisario señora Besançon pa hala Presidente di e kompania finansiero di aeropuerto, Doncher, na su orea pa vlam e riba kuater punto kardinal ku el a faya riba dje.

Primeramente e no por kibra kontrat ku un direktor sin tende e hunta di komisario.

Esei ta nan derecho legal ku Doncher mester respetá. Segundo: Mester tende Brian Mingo.

Tercero: Doncher no a duna e hunta di supervishon oportunidat pa duna nan opinion i vota riba e kaso.

Kuarto: E hunta di supervishon  no ta di akuerdo pa kore ku Mingo pasobra no tabatin motibu valido pa kore kune.

Ademas un paso asina ta masha malu pa aeropuerto, pasobra e no por funshona sin un direktor i esei ta nifika ku Doncher a violá reglanan di kondukta i lei di retiro hinkando e kompania manera un barku sin kapitan.

E karta di retiro na Mingo mes tabata manera kargá ku revanchismo, pasobra si pa regla e retiro mester a drenta na vigor te dia 6 di juni, nan a mand’é kas inmediatamente.

DONCHER A PERSISTI

Dado momento un dje komisarionan dje kompania mama a manda un karta pa Doncher pa informé ku el a hinka e kompania den un situashon di perkansia ku si esaki tin konsekuensia finansiero, nan lo tene su persona i demas komisarionan personalmente responsabel pe daño i pe hala e retiro aden mesora.

I pa pone e cherry riba e avalancha di reklamo kontra Doncher, Direktor di Royal Schiphol Group a manda bisa Promé Minister Jacobs i Minister di Transporte sra. de Weever pidiendo kuenta i rason mesora pakiko a kore ku Mingo sino nan no por sigi koperá ku gobiernu di Sint Maarten.

Ultimo palabra a keda na Hues, kende den su veredikto di djarason ultimo a splika ku e desishon di Doncher no bal e papel riba kual el a skirbi e karta, pasobra e kompania mama no tin derecho legal pa kore ku Mingo pasobra e no ta den nan servisio!

Mingo tin un akuerdo ku e kompania operador di e aeropuerto no ku e kompania mama doño dje aeropuerto.

Esei ta nifika ku Mingo ta ketu bai Direktor di aeropuerto i mester bai traha bèk mesora.

Arkitekto dje desishon pa retirá Mingo por kuminsa un otro kaso sivil wèl, pero mientrastantu mester laga Mingo kuminsa traha bèk mesora so pena di  US $ 20.000,00 pa kada dia ku pasa. Nan tin ku paga Mingo su gastunan di honorario di abogado tambe.