Fundacion Lotto ta fiando placa, pero corda ora di fia placa, cu mester paga bek y cu interes

Investigacion periodistico di AWEMainta ta mustra cu e articulo di Fundacion Lotto pa Deporte bisando cu ‘Debe di facilidadnan ta parti di Lotto su contribucion na deporte’ ta hopi straño y incomprendibel. Di con?

E meta di e fundacion di Gobierno Lotto pa Deporte ta pa netamente organisa weganan di loteria y catochi, cambiando bida di su hungadornan y na mes momento inverti den deporte local pa medio di subsidio y donacion.

Ta por medio di wega di placa ta genera fondo pa yuda deporte. Ningun momento e intencion por ta pa fia placa cu interes y inverti esaki den deporte. Corda bon cu debe y interes mester wordo paga bek.

Fiamento di mas por trece problema serio si no tin liquidez ora di paga bek. Hasta un Gobierno di un pais por haye den problema di debe. Nunca un maneho sano pa cu deporte por ta fia placa y ora di paga bek ta bolbe fia placa pa paga debe y interes bek.

Tambe ora di fia placa mester cana na un manera transparente e caminda legal di statuto sin purba di busca ‘loophole’.

Un otro asunto ta, cu tin evidencia cu e debe haci na 2011 dor di Fundacion Lotto pa Deporte no solamente tin di haber cu e facilidadnan, pero tambe cu otro sorto di pagonan manera, retraso den “fee” pa cu e socio strategico di Lotto pa Deporte cu ta Canadian Bank Note (CBN).

Loke ta mas importante den mesun articulo ta papia cu manera conoci, na 2011, CBN a wordo pidi pa Stichting Fundacion Lotto pa Deporte hunto cu Gobierno di Aruba pa asumi maneho di un loteria cu tabata cerca di declara bancarota.

Pregunta clave ta kendenan tabata responsabel p’e maneho di Lotto na momento ey cu tabata cerca di declara e fundacion bancarota.

Un investigacion imparcial mester determina esey y mester por wak tambe si legalmente por pone hendenan envolvi responsabel den e caso aki.

E dossier di Lotto pa Deporte ta keda sensativo. Ta biento fresco di cambio so por trece claridad den e misterio aki di Lotto pa Deporte.