Pabien na Cas di Cultura, sra. Marlene ‘Lenie’ Henttu-Jeandor y sr. Jhon Freddy Tobon Montoya cu nan reconocemento en coneccion cu Dia Mundial di Teatro

Diasabra ultimo, 8 di mei 2021, Shailiny Tromp-Lee, Parlamentario di MEP a asisti na celebracion di Dia Mundial di Teatro caminda banda di un show bunita y varia, a haci entrega di 3 Premio Nacional di Teatro 2020-2021.

Reconocemento 2020-2021

Banda di un tremendo anochi yena di talento y creatividad riba escenario, Gobierno a haci entrega di e prome Premio Nacional di Bida Largo na: Cas di Cultura – como Aruba su plataforma cultural desde 1958.

Celebracion di mas di 60 aña di aporte na y di servicio teatral, caminda nan a realisa den cooperacion congreso y proyectonan asina balioso pa lanta arte di tarima aki na Aruba y mas cu claro nan ta gosa di reconocemento tanto nacional como internacional.

Otro premio cu a keda entrega e anochi aki tabata e premio Nacional di Teatro. Esaki a keda otorga na sra. Marlene ‘Lenie” Henttu-Jeandor pa su trayectoria y excelente aporte den e mundo teatral y pa su publicacion(nan) realisa.

Un persona cu Shailiny Tromp-Lee a bisa di ta admira y tin un aprecio y stimacion grandi pe tambe a keda reconocí durante e anochi aki. Ta trata di Jhon Freddy Tobon Montoya. Un amigo colega cu tin un amor asina grandi pa nos pais y su cultura.

E no a nace na Aruba, pero sigur ta sinti’e un Arubiano. Unda e por yuda y duna un man e tey. Su reconocimento ta uno bon mereci y Shailiny Tromp-Lee a declara  tur ora ta bise cu e ta admira su trabou diario cu e ta haci pa cultura di nos país.

Historia Premio Nacional di Teatro

Departamento di Cultura Aruba conhuntamente cu Ministerio di Cultura ta otorga anualmente Premio Nacional di Teatro. Un premio cu a keda introduci bou auspicio di su tata Ramon Lee tempo e tabata Minister di Cultura. Desde aña 2005 ta otorga e Premio Nacional di Teatro na un persona, grupo of fundacion cu a traha y a contribui grandemente n’e desaroyo di teatro na Aruba.

Shailiny Tromp-Lee kier a termina felicitando di curason tur cu a keda reconoci durante e anochi aki. Spera nan por fungi como role model pa e generacion nobo/jong.