Studiantenan di Facultad di Turismo, activo den comunidad, a entrega donacion na Fundacion Salba Nos Burico

Dia 13 di mei ultimo, alumnonan di Facultad di Turismo di Universidad di Aruba a bishita Donkey Sanctuary pa entrega nan donacion di AWG 2,200 (dos mil, dos shen florin) n’e fundacion Donkey Sanctuary Aruba, tambe registra como Fundacion Salba Nos Burico.

Como parti di nan curriculum universitario, en coneccion cu nan curso di MICE: Meetings, Conventions and Events, e studiantenan mester a organiza eventonan como parti di nan studio experimental. A dicidi cu cada grupo lo organiza un evento pa recauda fondo pa un fundacion den comunidad y asina reinforza responsabilidad social den nos comunidad. Como parti di un desaroyo sostenibel, un di e aspect nan importante, t’e bienestar di nos mesun comunidad.

Di e forma aki, duranti luna di april 2021, diferente grupo for di Facultad di Turismo a organisa fundraising pa diferente fundacion, entre otro Stichting Rancho cu vitual workshop con ta sembra bo mes un fruta y berdura nan, diferente actividad nan pa recauda fondo nan pa Fundacion Respeta Mi, Fundacion pa Nos Comunidad y Luna Foundation, Telefon pa Hubentud, entre otro nan, y den e caso aki, tambe un di e grupo nan a recauda fondo nan pa Donkey Sanctuary. Como evento pa recauda fondo, e studiante nan a organisa benta di snack boxes duranti diferente dia, y por a yega n’e bunita donacion di AWG 2,200.00 pa Donkey Sanctuary.
E fundraising aki pa Fundacion Salba Nos Burico a wordo organiza dor di e siguiente studiantenan: Jose Marcano, Amber Salazar, Kenia Rodriguez y Hannah Lee. E studiantenan aki kier a gradici nan docente di MICE: Sra. Jo-Ann Croes, Staff di Universidad di Aruba, specialmente Facility Management Team pa nan cooperacion, marketing department y Circle K Club di Universidad, Tostao Canteen, tur amigo, famia, y colega cu a contribui na e fundraising. Tambe kier a corda comunidad di Aruba cu Donkey Sanctuary situa na Bringamosa 2Z ta habri diariamente di 9am pa 4pm, entrada ta gratis y e buriconan ta amigabel. E ta un leuk lugar pa relaha y pa bishita como famia. Por cumpra diferente baki nan di cuminda pa duna nan di come y coopera cu e fundacion.