Ayera Landsrecherche a detene como sospechoso den caso Avestruz ex-Secretaria di ex-Minister Benny Sevinger

Mary Hsing sigur lo no ta ultimo sospechoso cu lo wordo deteni. Awe Landsrecherche lo bay busca e koffie-meisje, kende tambe a traha na oficina di ex-Minister Benny Sevinger y despues ta turno di chofer di e ex-Minister. Asina Husticia ta piscando pa finalmente bay cu Benny Sevinger mes, cu sigur lo ta dia 24 di juni awor.

Segun informacion recibi, funcionarionan di Landsrecherche ta trahando di dia y anochi pa trata di sera e caso Avestruz prome cu eleccion.

Ayera a Landsrecherche a detene Mary Hsing, unda a cuminsa cu pa interogacion y den oranan di atardi, lague sa cu e ta deteni.

Hsing tabata Secretaria di Benny Sevinger, tempo cu e tabata Minister den Gabinete Mike Eman II. Un persona di confiansa, trahando estrechamente cu Freddy Every, Chief of Staff di e Ministerio aki.

E investigacion ya caba a drenta un otro fase. Si inicialmente e tabata concentra riba esnan cu a haya tereno, el a sigui p’esnan cu tabatin contacto estrecho cu e beneficiarionan y awor el a yega hopi cerca di e mandatario pa cual ta pensa cu pronto lo por yega n’e punto cu t’e ex mandatario. Practicamente tur siman tin un detencion y poco-poco e ta yegando cerca di politico mes.

Benny Sevinger mes no a wordo interroga ainda, pero si a haci dos inval na su cas. Avestruz su investigacion a cuminsa na 2017.

Hopi observador ta kere cu Avestruz lo dal den Flamingo, cu tambe tin caso di dunamento di tereno.

Den e reciente investigacion di caso Flamingo, e ex-lider di POR y ex-Minister Otmar Oduber ta un sospechoso.

Ministerio Publico a confirma cu sigur tin Fisccal cu ta investigando Caso Flamingo tambe, pero no por bisa ki dia cu lo tin detencion.