Busto di Juan Pablo II dilanti misa di Playa

Dialuna atardi a tuma lugar e desvelo di e busto di Santo Juan Pablo II dilanti Pro Cathedral San Francisco na Playa. Ciro Abath tabata e persona asigna pa haci esaki y e mester a studia e persona su filosofia, storia y caracter. 

Y tambe scoge den ki momento di su bida ta bay retrat’e. Si ta tempo cu e tabata jong of ora cu el a bira Papa. Esey ta loke el a hinca den su trabou.

Na comienso a traha riba su cabes, ta purba enfoca riba un cierto limite di edad pa mustra su caracter mas fuerte.

Pa su cara so a tuma 4 luna y pa caba cu ne, e sculpting (slijpwerk) a dura 5 luna mas. Tur esaki pa por a saca e detayenan, pa adapta tur e detayenan, trabou cu ta tuma tempo. Na final, e concepto di misa, adapta local, tur esaki ta tuma tempo. En total, Ciro Abath a bisa cu a tum’e 9 luna pa finalisa ful e proyecto.

Loke cu fielnan ta puntra, dicon e busto aki no a ser poni dilanti di Misa di Tanki Leendert, cual misa ta carga nomber di Papa Juan Pablo II.