Dia 31 di mei Hues lo disidi riba petishon di kastigu pa Shaidrulino Mutueel

WILLEMSTAD – Ayera Hues a trata di e kaso di Shaidrulino Mutueel di 24 aña di edat, kende pa Ministerio Públiko a keda akusá pa 3 akto kastigabel, esta (*) violensia públikamente kometé dia 24 di yüni 2020, (*) kómplise den destrukshon riba e mesun fecha i instigashon.

Aki klaramente ta referí n’e disturbionan ku a tuma lugá dia 24 di jüni 2020 den Punda kuminsando na altura di Plaza Piar pa kontinuá den sentro di gobernashon ku ta Fort Amsterdam i na otro partinan di Kòrsou, entre otro den Saliña i Otrobanda.

Aki durante di akshonnan di malkontentu demostrantenan a pusha e porta prinsipal di Fòrti basha abou i na sierto momento outoridatnan a hasi uzo di ‘traangas’.

INSTIGASHON

Pa loke ta trata e akusashon di instigashon, segun Ministerio Públiko Shaidrulino Mutueel durante e periodo 14 yüni pa 24 di yüni 2020 a hasi publikashonnan riba facebook ku ta indiká ku lo el a instigá komunidat di Kòrsou p’e accionnan di protesta.

Komo tal Ministerio Públiko a referí na frasenan ku a sali riba su página di facebook kaminda el a bisa: “….Awèl si pueblo no ke uni ta bai obligá pueblo uni”.

Tambe el a bisa: “….Be pending akshon ta konta, basta ku papiamentu awor!”

“…..Rabiá bo ta tòg, awèl dia bo mira mi riba kaya djòin mi, demostrá kon rabiá bo ta ku akshon i no na kas via telefon”.

Tambe Ministerio Públiko a bai bèk na un entrevista di dia 17 di yüni riba Brùg Juliana, kaminda Mutueel lo a apoyá manifestantenan pa krea union i òf buska kontakto kuné via facebook, kaminda el a bisa ku lo bai tin akshon.

Netamente e tipo di ekspreshonnan aki den bista di Ministerio Públiko ta konsiderá komo lantamentu di miembronan di e komunidat aki pa hiba akshon.

Mas aleu segun otro deklarashonnan ku el a hasi dia 18 di yüni 2020, Mutueel a bisa: “…Durante e 3 añanan aki Gobièrnu no a respetá ami ni mi pais, pakico ami sí tin ku bai respetá bosonan? “Dònder òp hòm”.

“Ku bosonan ke òf no mi ta bai obligá e pueblo aki lanta un dia”. “Bosonan kuenta ku si bosonan no gusta”. “Shonnan ready siii?’

Otro deklarashonnan di instigashon ku Shaidrulino Mutueel a hasi riba su página di facebook tabata dia 22 di yüni 2020 kaminda el a bisa: “…. bin manifestá sin miedu ku lo bo pèrdè bo trabou, pasobra tòg lo bo pèrdè trabou”.

“Na momento ku nos demostrá pasifikamentu lo mi laga sende 2 pa 3 tayer na kandela, mi a kuminsá motivá algun persona pa hasi esei”. “Esnan ku rabia pasobra tráfiko a djèm, mi no tin kunes. Rabia numa i sali fo’i bo outo i djòin nos” .

Mas aleu, segun Ministerio Públiko den persona di señora mr. Emma de Groot, dia 24 di yüni 2020 tambe tabatin otro ekspreshonnan di instigashon manera: “Lihé, lihé, laga tur hende bini Waaigat”.

“Ta awor òf nunka, laga polis bini numa”.  “Mi no por hasi nada mi so, mi mester di pueblo na mi banda”. “Pueblo mester uni, sino lo oblig’é”.

Tambe Shaidrulino Mutueel ta akusá ku durante e periodo 17 di yüni 2020 pa 18 yüni 2020 el a distruí huntu ku otronan bòrchi di tráfiko, blòkia kaminda, sende kandela riba kaya, stroba ku barankanan di piedra riba kaminda depositá, sende tayer na kandela, esaki tantu riba Brùg Juliana, komo na Caracasbaaiweg, den e bario Rooi Santoe etcetera.