FASE ta termina 30 di juni awor y Gobierno no tin presupuesto pa ehecucion di PIO

Goberna sin pia ni cabes of goberna a base di incapacidad ta unico splicacion cu tin relaciona cu loke tabata Gabinete Wever Croes y loke a resta di dje awor.

Esey t’e conclusion cu por saca for di un Gobierno demisionario cu realmente ta un Gobierno di partido MEP, cu ta sigui insisti pa troce berdad, ni bisa trahadornan publico e berdad di e futuro di nan beneificionan secundario cu ta na peliger, pero ta sigui insisti pa trata di hustifica cosnan cu nan no por hustifica.

Recientemente Minister demisionario Glenbert Croes a mustra cu FASE lo termina y fecha pa esaki termina ta fin di luna di juni proximo, cu ta net e luna cu tin eleccion tambe loke ta practicamente confirma, cu Prome Minister demisionario y lider di MEP, a manda su Gobierno cas pa evita un daño mucho mas grandi pa loke ta su intento pa bolbe bek na poder.

N’e momentonan aki Gobierno di MEP aki ta gobernando segun presupuesto 2020, ya cu presupuesto 2021 no ta aproba ainda, no a wordo trata den Parlamento ya cu esaki lo yuda na sconde berdadnan financiero cu lo perhudica hopi hende.

FASE lo termina na luna di juni y segun e Minister aki, e ora Gobierno, cual Gobierno e no ta bisa, lo sigui cu e proceso aki via di un asina yama PIO, caminda lo mester mira esaki den e presupuesto pa aña 2022, mientras cu ainda no tin ningun siguransa cu e Gobierno di MEP lo haya aprobacion di Parlamento p’e presupuesto aki ya cu tur cos lo mustra cu e Gobierno demisionario aki no tin  sosten pa aproba esaki.

Ta increibel con un mandatario ta trata di maniobra e berdad di e asuntonan aki cu ta un asunto asina serio ya cu e ta regarda entrada di miles di trahador cu ainda no a haya nan trabou bek y ta confia totalmente riba e placa di FASE, pero despues di juni proximo, no tin ningun siguransa cu nan lo bay sigui haya ayudo di Gobierno aki.

Esaki ta weganan politico sin sentido, weganan hopi sensitivo caminda ta purba manipula cu interes di un pueblo cu a sufri hopi bou di e Gabinete Wever Croes caba y ainda lo sufri mas pa efectonan di decisionnan tuma pa un Prome Minister demisionario Evelyn Wever Croes, cu nunca a lanta para pa defende interes di su pueblo.

N’e momentonan aki Gobierno legalmente por sigui goberna a base di e presupuesto 2020, caminda por haci esaki solamente pa cumpli cu asuntonan coriente y no por inverti den absolutamente nada nobo na interes di pueblo.

Minister demisionario di Asunto Social ta papiando algo sabiendo cu su partido no ta sigur cu e lo bolbe den gobernacion, pero ta duna pueblo un speransa cu partido MEP no tin control ariba pero ta usa esaki como algo pa trata di saca probecho p’asina gana votonan di esnan cu ta depende di FASE n’e momentonan aki.

Presupuesto 2022 ainda ta den preparacion, pues ta imposibel pa kere c’un  partido MEP lo por a hincando e presupuesto aki den otro, mientras cu e unico cos cu nan por haci desde cu Evelyn a manda Gobierno cas na luna di maart ultimo, ta atende cu asuntonan coriente y preparacion di un presupuesto nobo pa 2022, kisas no ta parti di esaki.

Ta un asunto hopi serio, ya cu partido MEP ya caba despues dia  drenta Gobierno na 2017, no a cumpli cu promesanan haci durante di campaña, pero parce cu nan no a siña nan les, nan no tin remordimento pa tur e engañonan implementa contra votadornan cu a kere den nan y sigur e parti di goberna sin medida.

Tur hende cu ta dependiendo di FASE n’e momentonan aki, lo por haya nan mes den situacionnan hopi delicado caminda nan lo por perde nan entrada por completo mirando e falta di seriedad di otro Gobierno di MEP