Gobierno a cay, pero coordinadornan ta sigui cobra 25% di ‘ter beschikking’

Prome Minister demisionario algun siman atras, a bin dilanti y anuncia cu el a prohibi tur Minister di loke a resta di su gabinete, pa tuma trahadornan ‘ter beschikking’ den tempo di campaña aki, pero en realidad su gesto cu su persona lo ta considera “husto,” ta resulta di ta mas “inhusto” manera e promesanan sin cumpli cu el a haci cu pueblo den campaña 2017.

Ta bon pa menciona aki, cu contrario na loke un Minister y coordinador den servicio, loke AWEMainta ta publica, no tin nada di haber c’un partido politico of e supuesto deseo di  Director di AWEMainta pa bira Director di Tele-Aruba atrobe.

Informacionnan cu AWEMainta ta publicando den ultimo dianan, ta procedente for di propio seno di Gobierno y partido MEP, di hendenan yega n’e partido y e Ministernan demisionario, cu ta sigui insisti pa manipula cu e berdad, mientras cu ta un grupo chikito so t’esnan cu ta wordo privilegia grande y ricamente.

Pa mustra e falta di seriedad di tanto Prome Minister demisionario Evelyn Wever Croes como su otro Ministernan, ta bon pa mustra cu for di propio seno di e Gobierno di MEP aki, a wordo informa cu debidamente, tin hende “ter beschikking” di varios mandatario, hendenan cu ta cobra e 25% normal sin cu a corta den esaki, cu ta trahando cu e Ministernan.

No solamente e 25% di nan “ter beschikking”, pero tambe cu nan ta sigui cobra tur otro “toelage” cu nan tabata gosa di dje caba, mientras cu e trahadornan publico tin cu sigui entrega y practicamente lo bay perde practicamente tur nan beneficionan secundario den proximo lunanan.

Desde luna di maart cu Evelyn a manda su Gobierno cas, caminda practicmente tur coordinador of otronan tambe mester a bay cas, e hendenan aki ta cobrando keto bay e 25% aki, sin kita y sin pone, hunto cu nan toelagenan cu nan tin for di prome dia.

E no ta husto cu ta mesun Prome Minister aki a papia den pasado di sacrificio cu mester wordo haci, cu mester ta solidario cu miles di hende cu a perde nan trabou temporal of permanente, anto ora cu trahadornan publico sin ningun tipo di dialogo a acepta y ta cooperando cu esaki, ta bin sali na cla awor cu esnan sinta den oficina den Cocolishi, si ta sigui gosa di nan beneficionan mescos cu no tin crisis financiero den e pais.

AWEMainta ta ricibiendo varios informacion for di mesun seno di Gobierno y di partido MEP kendenan no ta haya esaki ta cuadra cu gobernantenan cu ta insisti cu nan ta integro, mientras cu na nan mes ta manipulando di e forma aki, actonan cu tin cu wordo califica como abuso.

Pruebanan tin, cifranan oficial AWEMainta a ricibi di e maniobranan aki caminda tanto na luna di maart como luna di april y lo ta sigur cu e siman aki tambe, e coordinadornan di Gobierno di MEP si ta bay cas cu nan beneficionan intacto manera palabra.

P’e previlegiadonan aki no a exigi pa nan ta solidario cu esnan cu a perde nan trabou y den henter e asunto aki, ta bolbe resalta di hecho cu sindicatonan di trahadornan publico, no ta cay riba e cosnan aki y ta keda keto laga Gobierno di MEP haci y deshaci cu derecho di nan miembronan.