Gobierno nobo lo hereda serie di medida pisa pa wordo implementa

Retiro repentino di Gabinete Wever Croes, ta sigui mustra riba un salto mortal di Prome Minister Wever Croes, pa scapa loke a keda di su Gobierno su integridad politico, ya cu haciendo e maniobra aki, el a scapa su partido di wordo cuestiona pa un serie di medida cu ainda tin cu wordo impementa.

Na prome lugar ta conoci cu varios medida cu ainda Gobierno di MEP no a pone pueblo na altura, lo wordo implementa ora cu Gobierno nobo sinta, ya cu ningun hende ta kere cu e coalicion di MEP-POR-RED, lo bolbe ripiti despues di eleccion di dia 25 di juni.

Retiro di cerca di 200 trahador publico, ta un medida cu mester a wordo ehecuta segun e protocol firma na 2018 caba pa Prome Minister Evelyn Wever Croes y Minister di Finansa Xiomara Maduro, pero a sigui prolonga esaki, sigui baila Hulanda. pero awor a ser mustra cu ehecucion di e medidanan aki, tin cu drenta na vigor dentro di poco.

Na luna di maart ultimo varios di e medidanan aki mester a wordo ehecuta y ta net e luna cu e lider di MEP a dicidi di manda su Gobierno cas, ganando asina un tiki espacio p’e medidanan aki no bay impacta e campaña di su partido geel.

Flexibilisacion di e mercado laboral mester a wordo ehecuta for di 15 di maart, mientras cu e impuesto nobo (BTW) di 18% riba tur loke un ciudadano cumpra, tambe mester a drenta na vigor pa dia 15 di maart, pero ta net den e dianan ey, Evelyn a manda su Gobierno cas, usando Alan Howell como malhechor pa haci esaki.

Na Colombia tambe Gobierno kier a introduci un reforma fiscal cu a pone pueblo lanta contra Gobierno, ya cu den bista di pueblo, t’e riconan ta bira mas rico y e pobernan ta birando mas pober ya cu e mesun tipo di medida aki cu Gobierno Colombiano tambe a implementa, ta horcando pueblo formalmente.

Awor ehecucion di e medida cruel aki, esta e BTW, Gobierno di MEP cu permiso di Hulanda a logra di schuif esaki te cu 2023 cual ningun momento por wordo considera un logro, ya cu e medida aki tin cu wordo introduci ya cu Evelyn y Xiomara a aproba esaki.

Retiro di casi 200 trahador di Gobierno, tambe mester a wordo ehecuta na luna di maart, pero aki un biaha mas mandando su Gobierno cas, e lider di MEP a logra gana tempo, p’asina su partido por drenta casnan ainda pa trata di haya confiansa un biaha mas for di pueblo.

Awor esaki, esta e retiro di cantidad di trahador publico, lo tin cu wordo ehecuta p’e proximo Gobierno, ya cu Hulanda semper a mira un cambio den gobernacion como un continuacion di gobernacion pues tur loke Evelyn y Xiomara a bay di acuerdo cu nan, tin cu wordo ehecuta p’e proximo Gobierno.

Mesun cos cu e asunto di beneficionan secundario di trahadornan publico cu tambe mester a wordo implementa na luna di maart ultimo, awor e cambia e fecha pa luna di october proximo y tambe ta otro intento di MEP pa scapa cara y sigui cu e speransa cu nan lo por gana confiansa tog di trahadornan publico, pero na october atrobe trahadornan publico lo mira kico lo bay pasa cu nan beneficionan secundario segun acuerdo firma pa Evelyn cu Xiomara.