Awor HOH cu tratamento pa kibra verkalking den ader

Recientemente na Dr. Horacio E. Oduber Hospital a trata dos pashent c’un tecnica nobo cu ta trata adernan sera cu hopi verkalking haciendo uzo di un balon. Anteriormente no por a trata nan na HOH y pues tabata manda e pashent den exterior pa haci e operacion di curason.

“Nos mester ta hopi orguyoso pasobra aki t’e prome centro di Caribe y tambe den Centro America pa cuminsa cu e tratamento aki. Dos pais di Latino America, esta Argentina y Chile, so a cuminsa cu e tecnica aki, pero tambe na Merca y Europa.  

A trata e dos pashentnan exitosamente cu e tecnica aki, Dr. Casper Laclé, cardiologo, a duna di conoce.

“Mi ta contento cu ambos caso a bay hopi bon y cu e pashentnan no mester bay afo, esta Colombia, pa opera”, asina dr. Casper Laclé a duna di conoce.

E tratamento inovativo aki pa nos isla ta grandi y di admira na unda ta haci uzo di un balon p’asina kibra e verkalking cu tin den ader. Na momento cu un ader tin hopi calcium, ta importante pa trata esaki prome cu pone un stent.

E tecnica pa haci esaki ta uno hopi costoso, dificil y cu hopi riesgo di problema of operacion di bypass.

Awor e tecnica aki ta haci uzo di mesun fisica cu niersteen vergruizing.

Loke ta haci’e bunita ta cu e ta kibra verkalking so, pero no ta daña e ader mes. Por trata pashentnan cu “vernauwing” hopi complica na un manera relativamente facil cu casi sero (0) riesgo.

E balon ta bastante costoso y ta comparabel cu e prijs di dos stent. Dr. Laclé a duna di conoce cu a papia cu AZV, kendenan a duna di conoce cu ta importante pa tin e tratamento aki na Aruba y nan lo cubri e gastonan aki

Loke t’e parti bon di e tratamento aki ta cu habri e ader cu tin “vernauwing” y por haci esey relativamente facil aki na Aruba mes. Pues e alternativa di cirugia di curason den exterior no ta uno necesario.

Tambe loke ta hacie atractivo ta cu e pashent ta keda un dia te cu un anochi den Hospital y e siguiente dia pashent por bay cas y e por ta na pia di trabou dos pa tres dia despues. Dr. Laclé ta contento cu e team cu Hsopital , uno cu ta super y ta dispuesto pa haci cosnan nobo pa por logra trata tur pashent na cas mes.