Castiga medionan di comunicacion cu placa di pueblo y awor ta papia di color politico

Pa: Victor (Toko) Winklaar

Un Gobierno cu no a goberna bon, un Gobierno cu no a cumpli cu promesanan grandi haci na pueblo, un Gobierno cu bou di su gobernacion debe nacional a crece manera nunca antes bisto, ta mas cu claro cu un Gobierno asina ta den desesperacion awor cu campaña politico ta den full swing.

E siman aki, Minister demisionario di Finansa, Xiomara Maduro sosteni pa algun payaso cu ta designa pa haci loke cu ordena nan pa haci, a bin cuestiona publicacionnan den AWEMainta relaciona cu medidanan caminda trahadornan publico lo perde gran parti di nan beneficionan secundario, mientras cu entre 150 pa 200 trahador di Gobierno, tin cu wordo manda cas.

E medidanan aki mester a drenta na vigor for di dia 15 di maart ultimo caba, pero for di momento cu Gabinete Wever Croes a cay, e fechanan a cambia y a yega na otro palabracion cu Gobierno Hulandes riba e momento pa ehecuta esakinan.

Un bon plan di principalmente e lider di partido MEP, kende a stagna ehecucion di su obranan mayor den estilo di medidanan, cu ainda lo bay afecta e poder di compra di nos hendenan ainda mas.

Retiro di trahadornan mester a tuma lugar tambe for di luna di maart, pero den porta di eleccion, partido MEP lo sufri daño ireparabel si enberdad su Gobierno bay over na ehecuta e medidanan aki, cual porcierto a cambia awor pa fecha di 22 di februari 2022.

Cu e mandatario ta trata di contradeci e informacion aki, loke e no a logra di haci tampoco, ta di compronde, pero cu ta laga sostenedor- y coordinadornan di mandatarionan bin dilanti cu argumentonan sin base, ta algo tristo, pero cu na mes momento ta confirma e mentalidad destructivo cu a bin ta afectando politica di nos pais pa hopi aña caba.

Entre otro a liga AWEMainta na partido AVP, insinuando cu e media aki lo ta di partido AVP y pa tal motibo ta publica e cosnan aki contra di partido y Gobierno di MEP, lubidando por complete cu ta Gobierno di MEP, ta lider di MEP Evelyn Wever Croes, a bay di acuerdo cu e medidanan aki, algun di nan cu ta data for di prome cu pandemia a bati na porta di e pais.

Ta for di 2018 tanto Prome Minister Evelyn Wever Croes como Minister di Finansa Xiomara Maduro a firma un protocol cu Hulanda, caminda a sigura cu lo bay baha gasto di e aparato publico, cu tambe lo bay manda al rededor di 200 trahador publico cas.

Pues retiro di un grupo di trahadornan publico ta data for di 2018 y awor el a wordo ancra den e acuerdo firma pa Evelyn Wever Croes cu Raymond Knops, pues di con ta trata di bagatalisa e publicacion di AWEMainta, no ta comprondibel.

Awor ora cu ta trata di liga AWEMainta na partido AVP, no solamente e ta ridiculo, pero e hendenan aki no tin nocion di kico partido MEP y su Gobierno a haci cu cantidad di medionan di comunicacion rond Aruba.

AWEMainta tin tres aña y mey cu nos no ta bin na consideracion pa un aviso di Gobierno, mescos cu varios otro medio di comunicacion cu tambe a wordo castiga pa motibo cu nan no ta sirbi partido MEP solamente.

Publicacionnan den AWEMainta semper ta liga na fuentenan serio y fededigno caminda principalmente den ultimo lunanan, por a ripara cu pueblo a cuminsa lanta for di soño, cu pueblo a cuminsa haya curashi pa lucha contra di e Gobierno abusado cu e pais tin.

Informacion cu ta wordo suministra for di den propio seno di e actual Gobierno, di hendenan di nan, pero cu ta altamente decepciona cu e forma con a goberna e pais aki ultimo añanan.

Na momento cu no tin argumento valido pa contradeci e publicacionnan di AWEMainta, ta sali un tipo pa sostene e Minister bisando cu Director di AWEMainta ta sostene partido AVP ya cu su persona ta anhelando pa bolbe wordo nombra como Director di Tele-Aruba, un puesto cu el a sirbi caba cu tur honor.

Ta otro mentira mas di un grupo di Mepista cu ta sigui ehempel di nan propio lidernan, di gaña y mal informa henter un pueblo, algo cu e Gobierno di MEP ta bay cumpli cuater aña haciendo caba.

Ningun dia Director di AWEMainta lo tin e anhelo pa bolbe como Director di Tele-Aruba, pero esaki ta demostracion di e mentalidad cu ta biba den seno di partido MEP, caminda cu no ta por nada Gobiernonan di MEP semper a wordo cataloga como Gobierno di Friends & Family.