Den man di Gabinete Wever-Croes nos pueblo a bira mas pober

Durante conferencia di prensa di fraccion di AVP, Parlamentario drs. Mervin Wyatt-Ras, a expresa cu awendia nos hendenan a bira mas pober. Dor di Covid, un cantidad grandi di cuidadano a perde trabou, e famianan aki no tin pan pa pone riba mesa di nan yiunan.

Nan no por paga cas, ni awa, coriente y impuesto. Tampoco nan por paga nan quota di auto, ni skol pa yiunan. Esaki ta un situacion hopi preocupante den nos comunidad.

E poder di compra di nos cuidadanonan a baha ya caba prome cu Covid. Desde aña 2018 caba Banco Central a indica esaki na momento cu a cuminisa kita personanan for di trabou y negoshinan a cuminsa baha e cantidad di personal pa motibo cu gastonan di haci negoshi a subi. N’e momento ey nos partido pa medio di nos lider a bati alarma caba, sinembargo niun hende a duna oido. Esaki ta netamente loke ta pasando na Aruba.

E falta di poder di compra a inicia ya caba di basta tempo ora e Gobierno aki a bin cu medidanan. Un di nan ta ora e Minister di Finanza, Maduro, a hisa BBO y a kita e BBO for di recibonan cu e cliente ta ricibi.

E falta di transparencia aki a haci cu comerciantenan por pone cualke prijs sin cu cuidadanonan por critica of reclama kico ta pone. Pues e control riba recibo no tey mas manera e tabata antes.

Nos pueblo no por ta critico mas pasobra e no sa cuanto BBO e ta paga. Eynan a cuminsa cu e proceso unda nos hendenan a perde gara riba loke nan ta paga. Ademas prijsnan a subi drastico.

Esaki no ta un situacion bon pa nos ciudadanonan, y ta hopi preocupante, segun e Parlamentario ta indica.

El a haci un apelacion riba e Ministernan di Asunto Social, Glenbert Croes, y esun encarga cu Asuntonan General, Evelyn Wever-Croes, pa haci algo n’e pobresa aki. E Minister di Finanza, Xiomara Maduro na momento cu e mester a yuda pueblo di Aruba el a a introduci  medidanan.

E parlamentario ta sigui bisa cu Gobierno a bin cu FASE, sinembargo FASE a resulta di ta un farce, pasobra hopi di nos cuidadanonan desemplea cu a kere cu nan lo haya un suma di emergencia y yudansa dor cu nan a perde trabou, no a haya esaki of mester a pasa un caminda di cruz pa bin na remarca, mientras otronan si ta hay’e mesora.

Tin un cantidad di persona cu no a haya FASE, ni a haya pakete di cuminda, ni a haya ayudo di Rode Kruis.

Den e crisis berdadero aki Gobierno a dicidi di bandona trabou y retira. Nan a planea esaki pa nan bay campaña. Awor den campaña si por mira cu e Minister di Asunto Social, Glenbert Croes, ta parti basket cu productonan “expired” p’asina haci comosifiera cu e ta duna pueblo cuminda. Si Minister realmente kier yuda pueblo cu no tin cuminda, e ayudo aki mester ta uno structural. E ayudo aki mester ta un pakete di cuminda cu ta wanta pa un luna of un siman sikiera y e ayudo aki mester ta trabou.

E Minister awor ta haci comosifuera e ta bay salba nos pueblo cu paketenan. E situacion aki ta inaceptabel.

Nos fraccion y partido AVP, ta sigui e desaroyo aki di serca y siguramente nos partido lo haci lo posibel pa rescata nos pais di e gobernantenan aki. Wyatt-Ras ta finalisa bisando cu su compromiso ta cu nos pueblo pa den e proximo gobernacion atende debidamente cu e asunto aki y haci posibel cu nos hendenan ta haya bek prosperidad den nan hogar y logra tambe cu tin empleo, pasobra e Gobierno aki enbes cu e ta yuda nos hendenan haya empleo e no ta haciendo nada. Tambe lo stimula esnan cu ke lanta nan propio negoshi. Esaki ta un reto, pero alabes un compromiso cu tin cu nos pueblo pa logra trece trankilidad y bienestar den nos pais.