Dos detencion pa falsificacion di documento, fraude y labamento di placa

WILLEMSTAD – Continuando cu un investigacion relacioná cu malversacion c.q. ladronisia na pia di trabou, falsificacion di documento y labamento di placa, Polis a haci un detencion.

Diahuebs 20 di mei 2021, alrededor di 10.30 or, Rechèrche di VVC, team encargá cu investigacionnan di fraude, personal di UST bou di supervision di Hues Comisario y Fiscal di Ministerio Público, a tene entrada hudicial na un adrès na Kaya Cederela.

N’e sitio a detené e hòmber sospechoso M.J.C. nacé na Còrsou di 45 aña di edad p’e hechonan ariba menshoná.

Dialuna 17 di mei último tambe Polis a detené un dama relacioná cu e caso aki. Ta trata di S.C.P. nacé na Còrsou di 28 aña di edad.

E detencion a tuma lugar alrededor di 14.05 or na Warda di Rechèrche. A presentá e sospechosonan dilanti un Fiscal auxiliar kende a ordená nan encarcelamento pendiente di mas investigacion.