Impuesto BTW di 18% no ta re-emplasa BBO, pero ta wordo agrega n’esaki

For di momento cu Minister demisionario di Finansa, Xiomara Maduro a informa cu introduccion di otro medida cu stempel di MEP riba dje, esta e 18% di BTW y cu esaki lo drenta na vigor te cu 2023, a lanta e pregunta cu si e medida aki, lo pone Gobierno elimina BBO cu a wordo aumenta na 2018 te cu 6%.

E contesta ta NO, e BTW ta bira un impuesto adicional riba loke ya tin caba, loke ya ta afectando grandemente e poder di compra di pueblo, cu lo sigui sinti e efectonan di Gobierno di MEP pa algun aña cu ta bin.

BTW di 18% ta wordo paga asina c’un ciudadano yega na caha di un supermercado of cualkier otro negoshi pa paga loke el a cumpra y riba e suma aki e tin cu paga e 18% aki.

Pues si un hende cumpra mercancia cu por ehempel a yega 100 florin, e tin cu paga 18 florin adicional p’e BTW y asina e por sigui subi, mientras mas e cliente cumpra.

AWEMainta a wordo informa cu e aumento di BBO te cu 6% dor di Gabinete Wever Croes, lo no wordo elimina, pero lo sigui su rumbo y tur cos ta mustra cu e poder di compra cu ya caba ta na un nivel pa mayoria di cas di famia rond Aruba, lo continua  ya cu e Gobierno di MEP simplemente nunca tabatin solucion pa pueblo.

Ora cu analisa e motibo di con Gobierno di MEP a insisti pa comerciantenan no pone e cobransa di BBO riba recibonan ya cu e plan pa introduci un medida adicional cu ta bira e BTW, si lo bin riba e recibo den futuro cu ta muestra di otro intento di Gobierno pa manipula e opinion publico y e berdad di e situacionnan aki.

Ya caba inflacion na 2018 y 2019 a aumenta barbaramente segun cifranan di CBS, pero cu e introduccion di BTW sin duda lo bay conoce otro aumento di inflacion cu lo percura pa hopi problema den casnan di famia rond e isla. BTW tin cu wordo paga riba tur cos c’un ciudadano cumpra y esaki t’e tipo di solucionnan cu e lider di MEP a engaña pueblo cu na ora cu el a bisa cu su partido lo goberna sin medida.