9 Aña di kastigu pa Venezolano cu a tira riba Dominikano

WILLEMSTAD – Fiskal señora mr. Eva Bos djarason último a demandá un kastigu di prizon di 9 aña p’e Venezolano Angelo Medina Bolanos di 27 aña di edat, kende dia 14 di yüni 2020 a tira dirigi riba un persona ku e tabatin problema kuné.

Pero el a alkansá un Dominikano kende tabata presente n’e sitio, esta na Club Mulata. Manera ta konosí Club Mulata ta situá den e hanchi banda di e konosido negoshi Señor Barata riba Rooseveltweg.

Ademas di a lòs tirunan ku arma di kandela ku a heridá e Dominikano ku yama Marcos T. Perez-Reyes, e hòmber Venezolano Angelo Medina Bolanos ‘Puyi’ ta akusá di poseshon di arma di kandela i 491 gram hennep dia 20 di novèmber 2020,  na momento ku outoridatnan a gar’é. Tabata den oranan di madrugá, algu despues di 12or ku e suseso aki a tuma lugar. Den sala di Korte a pasa parti di e problemanan aki riba video, kaminda ta mira Angelo Medina Bolanos for di dos diferente ángulo kore bai, el a tira dos biaha, despues el a bolbe tira kaba disparsé for di e sitio.

Segun Fiskal Bos e trio Angelo Medina Bolanos, alias Puyi huntu ku Piyo i El Nino ta responsabel pa un problema ku un grupo di Colombiano. Tabata e víktima Marcos Perez Reyes kende a deklará na outoridatnan ku ta Puyi a herid’é ku arma di kandela. Finalmente tantu e doño di Club Molato i su señora a duna e deklarashon ku ta Angelo Medina Blanos, alias Puyi a tira, kometiendo e akto kastigabel aki.