Asesino di Bas van Wijk mester paga €112,607,49

WILLEMSTAD – Djamars ultimo un tribunal penal na Amsterdam a kondená e Marokano Samir el Yousfi na 9 aña di kastigu di prizon pe hecho ku el a asesiná e hoben Bas van Wijk, kende a nase na Kòrsou, pero a repatriá na edat di 5 aña pa Hulanda ku su mayornan.

Durante e proseso e famianan di Bas van Wijk tabatin oportunidat pa pidi indemnisashon pa pèrdida di nan yiu i ruman i na tur 6 miembro dje famia a pidi un total di 112,607,49 Euro di “plaka di pena”.

Den e suma aki tin sèn tambe reservá pa paga biaha di e difuntu dia eventualmente nan manda su restunan kremá pa Kòrsou pa nan der’é den tumba di su mama aki.

E asesinato a kousa masha konsternashon na Hulanda ya ku ta pa stroba e Marokano di kita un oloshi di marka ‘fake’ for di su kompañero, e Marokano a likid’é ku dos tiru.

E Marokano ku no ta ni biba na Amsterdam, pero na Hoofddorp a bai Amsterdam e dia ei ku e intenshon p’e ku su amigunan tira atrako riba kualke viktima ku nan topa riba nan kaminda.

E asesino tin 21 aña i Bas mes kende tabata biba na Haarlem, tabatin 24 aña na momento di su morto.

E asesinato a tuma lugar na un atrakshon turistiko ku ta keda na Nieuw Meir na Amsterdam.

Dos dje famianan di e viktima a preferá di keda anonimo pa evitá represaya dje amigunan dje Marokano.

E asesinato a sosodé aña pasá 8 ougustus den Park de Oeverlanden kaminda Bas van Wijk a bai diberti ku un grupo di amigu, pero e mesun dia mas tempran nan tabatin diskushon ku un grupo di Marokano entre nan Samir El Yousfi kende a fiha riba e oloshi dje amigu di Bas van Wijk.

Un par di ora despues e asesino a menasa Bas van Wijk i su amigunan i sin pensa dos biaha a likida Bas van Wijk ku dos tiru.

Ambulans a yega rapidamente, pero no por a reanim’é mas.

Dos siman pasá Ministerio Publiko a pidi 18 aña di kastigu di prizon pe asesino, pero pa motibu di un eror den formulashon dje kargonan, Hues no por a kondené na mas ku 9 aña.

Lei penal na Hulanda ta bisa ku solamente esnan ku a sufri un pèrdida ku morto dje viktima por pidi daño i perwisio pero si e viktima a muri debí na un krimen, famianan tambe por pidi daño i perwisio.

E kompensashon ku nan por pidi ta si nan a pèrdè nan fuente di entrada pa motibu dje asesinato, daño mental, gastunan di entiero, daño pa shòk i kompensashon si e persona lo a bira heredero dje viktima.

HUES TA DI AKUERDO

Riba e detayenan aki Hues a splika ku e ta grandemente di akuerdo ku e petishonnan pasobra e famianan a keda perhudiká.

Loke sí ta sorprendente t’e variedat di kosnan ku e famianan a kobra.

Por ehempel tata di e difuntu a kobra e gastunan di entiero i e bar ku bebida ku a pone pa hendenan ku a bin ofrese nan kondolensia.

Esei a kosta 10.440,42 EURO, aparte di gastu di notario a rason di € 866,57, gastu di paña nobo pa entiero € 642,98, gastunan pa stashoná outo na hospital i durante entiero 43,26 EURO ta gastunan legitimo.

Abogado dje asesino tambe a bai di akuerdo ku e montantenan aki.

Pero loke a bin aserka sorpresivamente ta gastunan di entiero na KORSOU!!

Esei ta a rason di € 9.008,45, den sentido ku t’e shinishi dje difuntu den su urna ku mester bin Kòrsou.

El a un gastu legitimo, pasobra Hues no a duda ku despues di tempu lo pone e urna ku shinishi dje difuntu den tumba di su mama ku ta derá na Kòrsou.

Kosto di e transporte aki ta komo 4000 EURO pero futuro gastunan mediko i biahe pa bishita dokter e no ta honra.

Doño dje kas kaminda e difuntu tabata biba kier a kobra e alkiler ku e ta pèrdè pero Hues a ninga di honra esaki.

Na tur Hues a konsedé e tata un kompensashon di  €15.993,23 plus un suma di  €11.993,23 na daño material.

E ASESINATO

Un Marokano a mata Bas van Wijk pasobra e kier a stroba e Marokano pa kita un oloshi di oro ‘fake’ for di un amigu i esei a pone ku e Marokano a yega serka dje i tir’é mata ku dos tiru.

E gran inhustisia den e kaso aki ta ku pe delito aki Ministerio Publiko mester a pidi 18 aña di kastigu di prizon, pero den nan inkompetensia pa formula e kargonan supsidiario nan a lubidá di pone fecha i sitio den e dagfar i esei a pone ku e asesino a haña un kastigu di solamente 9 aña. Posiblemente por koregí esaki si Ministerio Publiko apelá e veredikto i den apelashon pidi 18 aña, pero ya kaba e veredikto a kousa masha rabia serka e famianan.