Piscadonan a acerca mi, y mi a demostra cu mi a para pa nan!

“Union di Piscado a acerca mi aña pasa cu un set di problema cu a bira peor pa nan den e pandemia. Asuntonan cu pa hopi tempo nan ta señala, pero cu durante pandemia a bira un peso insoportabel.

Mesora, como Presidente di Comision Fiho di Labor y Sector Primario mi a yama un reunion cu Union di Piscado riba 18 di mei 2020”, asina Parlamentario di MEP, Shailiny Tromp-Lee a cuminsa su relato.

E piscadornan a pidi pa por atende cu entre otro cu leynan, cual tratando di proteha naturalesa, tabata perhudica piscador y tabata crea situacionnan di conflicto y hasta descriminacion contra esnan cu tin como ofishi gara pisca pa hende come.

E piscadornan a pidi pa por cambia e ley di proteccion di naturalesa for di uno cu tabata prohibi y perhudica piscador, pa uno cu ta regula, maneha pesca p’asina por cumpli cu ambos meta, esta proteha naturalesa y abastece pueblo di cuminda fo’i lama.

Peticion di nos piscadornan y logro

Particularmente piscadornan tabata pidi pa por, bou regulacion cu condicionnan den permiso so,1) permiti piscamento cu harpun bek, 2) Permiti piscamento di kreft y calco bek, 3) adapta e leynan pa maneha e especienan marino enbes di prohibi y prohibi solamente.

E piscadornan a argumenta e.o. cu hasta e tratadonan ta duna espacio den diferente manera pa haci esaki.

Despues cu bou iniciativa di Shailiny Tromp-Lee, 15 di october 2020 Parlamento a scucha e piscadornan. Parlamento den su totalidad a pidi e parti ehecutivo di Gobierno, esta e Ministernan, pa atende cu e peticion di pueblo y trece un solucion a corto plaso mirando e situacion y urgencia p’e piscadornan.

Na final di cuenta, cu no a bay mes facil cu lo por a pensa, trahando hunto a logra trece cambio aceptabel riba corto plaso y cu bista pa un solucion duradero riba largo plazo. Piscadornan bou permiso estrictamente condiciona por awor pisca bou di un maneho temporal en espera di cambionan den e leynan mes.

Conclusion

Loke mester a resalta di henter e proceso ta 1) cu e rolnan di Parlamento y Gobierno ta separa, 2) cu Gobierno mester tene cuenta cu tur interes y cu tin ora mester por tira awa den biña p’e bienestar di comunidad, y 3) cu trahando hunto nos ta logra mas.

Shailiny Tromp-Lee a duna di conoce cu e ta para pa nos piscadornan y na mes momento pa proteccion den naturalesa. Nos mester di tur dos.

Con pa logra e mihor solucion? Ami ta kere den trece otro na mesa y unda tin desacuerdo, traha pa crea un brug pa nos topa otro y yega na solucionnan berdadero y duradero. Ami ta para pa bo tambe. Acerca mi con trahando hunto, nos por logra mas, segun e Parlamentario di MEP.