Abuzador di yiu di kriansa menor di edat a yora di bèrgwensa den Korte

WILLEMSTAD – Durante tratamentu di e kaso ayera di Eddiamar Silvanie di 32 aña di edat den sala di Korte, kende ta un siudadano ku a abuzá di su yiu di kriansa menor di edat, Fiskal señora Monique Dennaoui Simon i abogado señora mr. Olga Lodowica a elaborá ampliamente riba e papel di prensa i medionan sosial relashoná ku e aktonan inmoral ku Eddiamar Silvanie a kometé.

Tabata durante e periodo 13 di òktober 2016 pa 13 di òktober 2020 i tambe di 13 di òktober 2020 pa 4 di maart 2021 ku Eddiamar Silvanie a abuzá di e kriatura, anto esei a sosodé tantu na Ulanda komo na Kòrsou.

Ampliamente e dagfar ta deskribí kiko eksaktamente e hòmber aki a hasi ku e víktima menor di edat, kontra pago di sumanan di plaka variando di 10 pa 45 florin, kombiná ku promesa di telefon selular.

Despues di tratamentu di e kaso aki proforma den sala di Korte, algun siman pasá a resultá ku un òf mas miembro di e komunidat aki a kombiná loke a sali publiká den korant huntu ku e akusado (Eddiamar Silvanie) su pòtrèt i di tal forma klaramente a pone e akusado aki den un spòtlait ainda mas negativo.

Eddiamar Silvanie tabata bou di un enorme preshon, ya ku el a risibí menasa te den prizon kaminda e ta enkarselá aktualmente i su dunador di trabou a bis’é flèt ku e no por reanudá su trabou mas i te hasta ta asina ku a laga sa ku lo kima su outo.

Abogado mr. Olga Lodowica a konkluí ku su kliente di e forma aki a keda kastigá muchu mas ku tabata e intenshon.

Tur esaki a sosodé promé ku Hues mes tuma un desishon, segun e abogado.

Den sala di Korte ayera tabatin momento ku lágrima a basha for di e akusado aki su wowo, indikando ku el a sinti duele di loke el a hasi. Hues señora mr. G. Edelenbos a sigui hasi tur sorto di pregunta na Eddiamar Silvanie pa saka afó kon e akusado ta sinti su mes realmente, pero e Hues finalmente a opservá ku e no tin un bista eksakto, pasobra e akusado no ta kontestá riba e preguntanan esensial ku e Hues a hasi.

Mama di e víktima tabata presente den sala di Korte ayera. E víktima, kende ta un menor di edat, ya ta na Ulanda, bibá serka wela. Tabata e mama, kende ta partner di Eddiamar Silvanie ku a deskubrí pòtrèt i filmashonnan di su yiu den akshon ku e hòmber aki i a hasi denunsia na Polis.

Hues a puntra Eddiamar Silvanie di forma konkreto si e duele ku e tin ta pasobra a deskubrié  riba telefon òf ta pasobra ta duele realmente pa kosnan ku el a hasi robes.

Kontestanan riba e preguntanan aki, segun Hues señora mr. Edelenbos no ta nada kla.

Mas aleu a sigui hopi kuestionamentu riba e forma kon e hòmber aki a trata ku e mucha menor di edat aki, prinsipalmente e tipo di kòmbersashonnan ku nan sa hiba, kaminda Eddiamar Silvanie hasta a tribi kompará e muchu menor aki ku su mama, bisando e mucha flèt ku e ta trata muchu mas mihó ku su mama.

Remarkabel t’e hecho ku profeshonalnan no tabata riba un liña pa bisa si e chèns di ripitishon tei sí òf nò.

Sikiater no ta konsiderá Eddiamar Silvanie kapas pa kai den ripitishon, siendo sikólogo si.

Ademas  a bini padilanti ku e akusado aki ta un uzadó di mariwana i tabatin momento ku el a pone e mucha tambe uza mariwana.

Fiskal señora Dennaoui Simon finalmente a demandá un kastigu di prizon di 36 luna di kua 18 kondishonal i un periodo di prueba di 3 aña.

Ademas e akusado mester aseptá guia di Reclassering, tratamentu via FMA, guia sikológiko i e ta prohibí pa buska kontakto ku e mucha ku el a abuzá di dje. Hues señora mr G. Edelenbos a dikta konforme e petishon di Fiskal.