Aerial Dance and Performance Aruba ta presenta NA’VI

E academia di arte y baile acrobatico Aerial Dance & Performance Aruba ta den pleno preparacion pa nan proximo show, den cual alumnonan di e scol lo demostra nan talento durante un espectaculo di baile acrobatico.

Inspira p’e mundo di e pelicula Avatar, e show titula “Na’vi”, lo trece arte visual y baile acrobatico hunto, presenta p’e alumnonan mes.

Aerial Dance & Performance ta un scol di baile acrobatico funda na mei 2018 y ta duna les na muchanan for di e edad di 5 aña te cu adulto. Dirigi pa instructornan profesional certifica Maria Alejandra, Kelly Moreno y Daniela Sanchez, Aerial Dance & Performance Aruba ta conta cu un ekipo motiva pa inspira alumnonan pa crece den e mundo di baile arobatico.

Durante e espectaculo “Na’Vi”, e publico lo disfruta di un show dinamico, cu un variedad di elemento acrobatico manera Aerial Silks, Aerial Hoop y Aerial Cube.

E show ta conta cu participacion di mas cu 65 alumno cu ya tin lunanan practicando pa por demostra nan talento y progreso den e arte aki n’e comunidad di Aruba durante e espectaculo extraordinario aki.

Aerial Dance & Performance Aruba lo presenta “Na’Vi” riba diabierna 28 di mei 6.30 PM y diabierna 28 di mei 8.00 PM, como tambe diasabra 29 di mei 6.30 PM y diasabra 29 di mei 8.00 PM.

Pa tur esnan interesa den presencia e tremendo show aki, carchi ta obtenibel na Aerial Dance & Performance situa na Italiestraat 18 of via e number di WhatsApp +297 566-6833.

Pueblo di Aruba ta invita pa bin apoya e desaroyo artistico di nos talentonan den arte y baile acrobatico!