Benny Sevinger Deteni Pa Cu Caso Avestruz

Ex-minister Benny Sevinger (AVP)

Awe parti mainta, aparentemente despues di un entrevista cu radio station Magic FM, Benny Sevinger di AVP y compañantenan a bay dal un coffee na De La Salle Straat ora cu autoridadnan a yega y a deten’e bay cu n’e.

Sospecha a cay riba parlamentario Sevinger pa cu e caso di Avestruz cu investigacion andando n’e momentonan aki.

No hopi tempo despues di e suceso un video a wordo publica, casi den manera di anticipacion cu esaki lo pasa, unda Sevinger ta splica su banda di e moneda den tal caso cu e wordo deteni.

El a haci’e hopi cla den e video dirigi na pueblo y Ministerio Publico cu e ta mantene su inocencia.

Den un carta di respondi di MP ariba 17 di maart, ta constata cu n’e tempo di skirbi e carta no tawatin ningun acusacion ainda contra Sevinger y cu e caso tawata den e fase di opsporing. Ademas e carta a bisa cu no ta premira un decision concreto prome cu september debi n’e pandemia y cu consecuencia e tempo cu lo dura pa yega na uno. Sevinger a tuma esaki como un punto central na su defensa y ta acusa partido MEP di a presiona MP pa haci un acusacion contra dje.

Esaki dor cu e ta di e opinion cu na man di e disolucion di Parlamento, un par di dia despues di e respondi y cu eleccion yegando pronto, convenientemente MEP ta purbando di remedia e daño haci n’e kiebre di integridad door di acusa y impone interogacion riba AVP pa ademas yudanan gana e eleccion.

E ta acusa Gobierno di ta uno dictatorial y autoritario, aunke den carta no tawata bisa concretamente cu no tin posibilidad cu por yega na un decision riba su caso prome cu september, sino cu tin un probabilidad grandi. Ademas un tempo a pasa den cual mas informacion lo a drenta desde e carta di respondi di MP.

Sevinger ta para firme riba su inocencia y cu pronto e berdad lo sali.